गिरगावच्या पालिका शाळेची
जागा ट्रस्टला देण्यास विरोध

​पीपीपी तत्त्वावरील प्रकल्पाच्या पुनर्विचारासाठी समिती

सकाळ वृत्तसेवा
​मुंबई, ता. १० : गिरगावातील कुंभारवाडा येथील ऐतिहासिक दुर्गादेवी महापालिका शाळेची जागा सार्वजनिक-खासगी भागीदारी तत्त्वावर एका खासगी संस्थेला देऊन शाळेचा पुनर्विकास करण्याच्या पालिका प्रशासनाच्या निर्णयाला जोरदार विरोध सुरू झाला आहे. महापालिकेच्या मालकीचा हा मोक्याचा भूखंड खासगी संस्थेच्या घशात घालण्याऐवजी पालिकेने स्वतःच्या निधीतून तिथे नवीन अद्ययावत शाळा उभारावी, अशी मागणी लोकप्रतिनिधींनी केली आहे. वाढत्या विरोधामुळे आणि पत्रांच्या भडिमारामुळे अखेर महापालिकेने या संपूर्ण प्रकल्पाच्या पुनर्विचारासाठी विशेष समितीची स्थापन केली आहे.

​नगरसेविका संपदा मयेकर यांच्यासह स्थानिक लोकप्रतिनिधींनी या प्रस्तावाला तीव्र आक्षेप घेतला आहे. शिक्षण विभागाने दिलेल्या माहितीनुसार, दुर्गादेवी शाळेचा भूखंड ‘विरेंद्र स्वरूप मेमोरियल ट्रस्ट’ या संस्थेला हस्तांतरित करण्यासाठी ‘लेटर ऑफ अवॉर्ड’ देण्यात आले आहे. ​संबंधित ट्रस्टने ‘वन टाइम प्रीमियम’सह सर्व कायदेशीर आणि प्रशासकीय शुल्क पालिकेकडे जमा केले आहे. करारातील अटींनुसार संस्थेने ‘एसपीव्ही’ कंपनीची स्थापनाही केली आहे. या कराराला पालिका आयुक्तांची मंजुरी मिळाली आहे. मुद्रांक शुल्काची प्रक्रिया पूर्ण झाली आहे. सध्या केवळ कराराच्या अंतिम नोंदणीची प्रक्रिया प्रलंबित असून, ती पूर्ण होताच प्रत्यक्ष कामाला सुरुवात करण्याचे शिक्षण विभागाचे नियोजन होते.

संपूर्ण प्रकरणाची सखोल चौकशी व अभ्यास करून अहवाल सादर करण्यासाठी प्रशासनाने समिती स्थापन केली आहे. या समितीची पहिली बैठक पार पडली असून, तिचा अंतिम अहवाल प्राप्त झाल्यानंतरच या प्रकल्पाचे भवितव्य ठरणार असल्याचे शिक्षण विभागाने स्पष्ट केले आहे.