म्हाडाच्या अंबरनाथ, कल्याण
परिसरातील ९५० घरांचे काम सुरू

४५० घरे मंजुरीच्या प्रक्रियेत; तीन वर्षांत सर्व घरे तयार होणार

सकाळ वृत्तसेवा
मुंबई, ता. १८ : अत्यल्प उत्पन्न गटातील नागरिकांचे प्रधानमंत्री आवास योजनेंतर्गत स्वप्न पूर्ण करण्यासाठी म्हाडाच्या कोकण मंडळाकडून जोरदार तयारी सुरू आहे. त्यानुसार मुंबई वगळता एमएमआर क्षेत्रात अंबरनाथ, कल्याण परिसरात पीएमएवाय २.० अंतर्गत १,४०० घरे उभारली जाणार आहेत. त्यापैकी सुमारे ९५० घरांचे प्रत्यक्ष काम सुरू असून उर्वरित ४५० घरे वेगवेगळ्या मंजुरीच्या प्रतीक्षेत आहेत. पुढील तीन वर्षांत सर्व घरांचे काम पूर्ण केले जाणार आहे.
अत्यल्प उत्पन्न गटातील नागरिकांकडून प्रधानमंत्री आवास योजनेतील घरांना पसंती दिली जात आहे. त्याची दखल घेत कोकण मंडळाकडून अंबरनाथनजीक कोचकुंटवली येथे ६०० घरांचे काम सुरू केले आहे. शिवगंगानगर ३५० घरांचे नियोजन असून त्याच्या आराखड्याला मंजुरीची प्रतीक्षा सुरू आहे. मोरीवली येथे १०२ घरे उभारली जाणार असून त्यासाठी निविदा प्रक्रिया राबविली जाणार आहे. तर, कल्याणनजीक घोटेघर येथे ३४८ घरांचे काम सुरू आहे. ही घरे पुढील तीन वर्षांत पूर्ण करून विक्री करण्याचे म्हाडाचे नियोजन असल्याचे कोकण मंडळाच्या एका वरिष्ठ अधिकाऱ्याने सांगितले.
३२० चौरस फूट क्षेत्रफळ, २०-२२ लाख रुपये किंमत
म्हाडाकडून पीएमवायअंतर्गत उभारली जाणारी सर्व घरे अत्यल्प उत्पन्न गटासाठी आहेत. ३२० चौरस फूट चटई क्षेत्रफळ असलेल्या या घरांची किंमत २०-२२ लाखांच्या घरात असणार आहे. संबंधित उत्पन्न गटातील नागरिकांना अनेकदा कर्ज मिळवताना अडचणी येतात. त्यासाठी म्हाडा वेगवेगळ्या बँकांच्या माध्यमातून कर्ज उपलब्ध करून देण्यासाठी सहकार्य करणार आहे.