परदेशांत फराळ पाठवण्यासाठी पोस्टाची विशेष सुविधा
मोफत पिकअप सेवा; काही ठिकाणी पॅकिंगचीही सोय

सकाळ वृत्तसेवा
मुंबई, ता. १९ : दिवाळीनिमित्त परदेशात राहणाऱ्या नातेवाईक आणि मित्रांना घरचा फराळ पाठवण्यासाठी महाराष्ट्र टपाल परिमंडळाने आंतरराष्ट्रीय पार्सल सेवा उपलब्ध करून दिली आहे. चकली, चिवडा, लाडू, करंजी, शंकरपाळे तसेच भेटवस्तू या सेवेद्वारे विविध देशांत पाठवता येणार आहेत. नागरिकांच्या सुविधेसाठी प्रमुख पोस्ट कार्यालयांत पॅकिंगसह मोफत घरपोच पार्सल पिकअपचीही व्यवस्था करण्यात आली आहे.
टपाल विभागाने दिलेल्या माहितीनुसार, १० किलोंच्या पार्सलसाठी जपानला ४,७९७ रुपये, जर्मनीला ५,८७६, ब्रिटनला ६,४६१, फ्रान्सला ६,६३८, रशियाला ६,७५०, अमेरिकेला ९,०५१, कॅनडाला ९,६७६; तर ऑस्ट्रेलियासाठी ११,९१२ रुपये शुल्क आकारले जाणार आहे. राज्यातील सर्व जनरल पोस्ट ऑफिस (जीपीओ), मुख्य पोस्ट ऑफिस आणि निर्धारित पोस्ट कार्यालयांमध्ये पार्सलच्या सुरक्षित पॅकिंगची सुविधा उपलब्ध करण्यात आली आहे. प्रमुख पोस्ट कार्यालयांत जलद पॅकिंगसाठी आवश्यक उपकरणेही बसविण्यात आली आहेत. पोस्ट ऑफिसमध्ये जाणे शक्य नसलेल्या नागरिकांसाठी पोस्टमनमार्फत मोफत घरपोच पार्सल पिकअपची सोय आहे. त्यासाठी सकाळी ८ ते रात्री ८ या वेळेत संबंधित अधिकाऱ्यांशी संपर्क साधता येईल. परदेशातील आप्तेष्टांना फराळ आणि दिवाळीच्या भेटवस्तू पाठवण्यासाठी या सेवेचा लाभ घ्यावा, असे आवाहन महाराष्ट्र टपाल परिमंडळाचे मुख्य पोस्टमास्टर जनरल रामचंद्र जायभाये यांनी केले आहे.