कुख्यात गुंड छोटा राजनसह पाच जणांची निर्दोष सुटका
सकाळ वृत्तसेवा
मुंबई, ता. ३० : शिवसेना नेते अजय भोसलेवर २००९ मध्ये झालेल्या प्राणघातक हल्ल्याप्रकरणी विशेष सीबीआय न्यायालयाने कुख्यात गुंड छोटा राजनसह पाच जणांची शुक्रवारी (ता.३०) निर्दोष सुटका केली. निवडणुकीच्या प्रचारादरम्यान ११ ऑक्टोबर २००९ रोजी पुण्याच्या कोरेगाव भागात दुचाकीवरून आलेल्या हल्लेखोरांनी अजय भोसलेवर गोळ्या झाडल्या होत्या, या हल्ल्यात अजय भोसले सुदैवाने बचावले.
विशेष सीबीआय न्यायालयाचे न्या. नरेंद्रनाथ प्रधान यांनी राजन याच्यासह व्यावसायिक सुरेंद्र अग्रवाल, शकीब आलम खान, राजेश यादव आणि विजय पुरुषोत्तम साळवी यांची त्यांच्यावरील सर्व आरोपांतून निर्दोष सुटका करत असल्याचे निकाल देताना स्पष्ट केले. सरकारी पक्षाच्या आरोपांनुसार, हा हल्ला सुरेंद्र अग्रवाल आणि त्याचे भाऊ आर. के. अग्रवाल व व्ही. के. अग्रवाल यांच्यातील मालमत्तेच्या वादातून झाला होता. सुरेंद्रने राजनच्या कथित साथीदाराच्या मदतीने आर. के. अग्रवाल यांच्यावर कौटुंबिक मालमत्तेतील हिस्सा देण्याबाबत दबाव आणण्याचा प्रयत्न केला होता. भोसले हे आर. के. अग्रवाल यांचे मित्र होते. या प्रकरणाचा तपास सुरुवातीला पुण्यातील बंड गार्डन पोलिस ठाण्याद्वारे करण्यात आला होता, मात्र, २०१५ मध्ये राजनला भारतात परत आणल्यानंतर, त्याच्याविरुद्धच्या ७१ प्रकरणांपैकी हे एक प्रकरण राज्य सरकारच्या आदेशानुसार सीबीआयकडे सोपवण्यात आले होते.