मुरूड (बातमीदार) : श्री संत शिरोमणी संत रोहिदास महाराज यांची ६४६ वी जयंती श्री संत रोहिदास ज्ञाती पंचायत उसरोली यांनी ज्येष्ठ कार्यकर्ते लक्ष्मण नागू नांदगांवकर यांच्या अध्यक्षतेखाली मोठ्या उत्साहात साजरी केली. ज्ञाती पंचायतीचे अध्यक्ष प्रणय धोंडसेकर यांच्या हस्ते पुष्पहार अर्पण करून अभिवादन करण्यात आले. श्री संत रोहिदास महाराज यांच्या जीवन चरित्रावर उमेश पेणकर, शीतल नांदगावकर, हेमंत नांदगावकर, नारायण नांदगावकर, नामदेव नांदगावकर, आत्माराम नांदगावकर यांनी मोलाचे मार्गदर्शन केले. या कार्यक्रमात पहिली ते पदवीपर्यंतच्या विद्यार्थ्यांना बक्षिसे देऊन गौरवण्यात आले. अध्यक्षीय भाषणात धोंडसेकर यांनी ज्ञाती बांधवांसाठी अहोरात्र काम करण्याचा मानस व्यक्त केला. सूत्रसंचालन खजिनदार मंगेश नांदगांवकर यांनी केले.