मुरूड (बातमीदार)ः खारआंबोलीतील जय हनुमान मंदिरात शतकोत्तर महोत्सवानिमित्त विविध कार्यक्रमांचे आयोजन करण्यात आले होते. वारकरी संप्रदायाचा प्रभाव असलेल्‍या या गावाची लोकसंख्या १५०० च्या आसपास आहे. दोन दिवस चाललेल्‍या महोत्‍सवात मुंबईत स्थायिक झालेले चाकरमानीही मोठ्‌या संख्येने सहभागी झाले होते. यावेळी प्रतिष्ठित नागरिक, समाज अध्यक्ष तसेच मान्यवरांचा सन्मानचिन्ह देऊन सत्कार करण्यात आला. काकड आरती, श्री गणेश पूजन, पुण्यहवाचन, मारुती याग, अभिषेक, दिंडी प्रदक्षिणा-पालखी आदी धार्मिक कार्यक्रमांचे आयोजन भालचंद्र जोशी यांच्या पौरोहित्‍याखाली करण्यात आले होते. महोत्‍सवात तरुणांचा सहभाग लक्षणीय होता. महोत्सवात स्थानिक आमदार महेंद्र दळवी तसेच सर्वच राजकीय पक्षांचे प्रमुख, पदाधिकारी तसेच पंचक्रोशीतील ग्रामस्थांनी गर्दी केली होती. महोत्सवाचा समारोप देहू येथील पांडुरंग महाराज घुले यांचे कीर्तनाने झाला.