मुरुड, ता. २८ (बातमीदार) : सध्या हिवाळ्याचे वातावरण असल्यामुळे नांदगाव समुद्राकिनारी सीगल पक्ष्यांचे थवेच थवे दिसून येत आहेत. अशातच मंगळवारी (ता. २८) विहार करत असताना एका सीगलचा पाय जाळ्यात अडकल्यामुळे तो स्वतःची सुटका करून घेण्याचा प्रयत्न करत असल्याचे जितू दिवेकर यांना आढळले. फडफडणाऱ्या सीगलला जाळ्यातून त्यांनी बाहेर काढल्यानंतर त्याला उडता येत नसल्याचे लक्षात आले. त्यानंतर दिवेकर यांनी सीगलला निसर्गमित्र संदीप घरत याच्याकडे सुपूर्द केले. घरत यांनी पशुवैद्यकिय अधिकारी डॉ. पवार यांच्याकडे उपचार घेऊन मुरूड वनपरिक्षेत्र अधिकारी प्रियंका पाटील यांच्या मदतीने पुन्हा समुद्र किनारी पक्ष्यांच्या थव्यात सोडून देण्यात आले.