Murud News: महावितरण कंपनीकडून मुरूड तालुक्‍यात ३० एप्रिल रोजी संपूर्ण दिवस भारनियमन घेतले जाणार असल्‍याचे सांगण्यात आले आहे. त्‍यामुळे उकाड्यामुळे आधी‍च हैराण झालेल्‍या मुरूडकरांनी भारनियमनामुळे नाराजी व्‍यक्‍त केली आहे.

यंदा तीव्र उन्‍हाळा असल्‍याने गरमीमुळे मुरूडकर हैराण झाले आहे. त्‍यातच मागील २२ एप्रिल रोजी महावितरण कंपनीतर्फे मुरूड तालुक्यात भारनियमन करण्यात आले होते. तथापि,‍ येत्या ३० एप्रिल रोजी पुन्हा संपूर्ण तालुक्यात सकाळी दहा ते संध्याकाळी पाच वाजेपर्यंत महावितरणकडून भारनियमन करण्यात येणार असल्याचे मुरूड महावितरणचे उपकार्यकारी अभियंता कृष्णात सूर्यवंशी यांनी सांगितले आहे.

पावसाळ्यापूर्वीची कामे पूर्ण करण्यासाठी, शिवाय मुख्य विद्युत वाहिनीवरील झाडे तोडणे आदी कामांसाठी भारनियमन घेण्यात आल्‍याचे सांगण्यात येत आहे. या महिन्यात सलग दुसऱ्यांदा साप्ताहिक भारनियमन घेतल्याने उकाड्याने त्रस्त ग्राहकांनी नाराजी व्यक्त केली आहे.