मुरूड, ता. २५ (बातमीदार) ः महाशिवरात्रीनिमित्त अनेक शिवभक्‍त उपवास, व्रत वैकल्ये करतात. उपवासाला रताळ्यांना मागणी असल्‍याने नागरिकांकडून मोठ्या प्रमाणात खरेदी करण्यात येतात. तीन-चार दिवसांपासून मुरूड बाजारपेठेत शेकडो टन रताळ्यांची उलाढाल सुरू आहे.
कोकण किनारपट्टीवर पोर्तुगिजांचे वंशज आजही मुरूड तालुक्यातील कोर्लई गावात निवास करून आहेत. सुमारे २,००० लोकसंख्या असलेला हा समाज पारंपरिक पद्धतीने भाजीपाला, वांगी, पडवळ तसेच चिबूडचे मोठ्या प्रमाणावर उत्‍पादन घेत असून त्‍यावरच त्‍यांचा उदरनिर्वाह चालतो. महाशिवरात्रीनिमित्त लागवड केलेली रताळी आता तयार झाली असून बाजारात विक्रीसाठी उपलब्‍ध आहेत. गावठी वाण असलेली व चविष्ट असल्‍याने ग्राहकांकडून मोठी मागणी आहे.
रताळी हे पीक साधारण अडीच महिन्यांत तयार होते. यंदा नोव्हेंबरपर्यंत अवकाळीने धुमाकूळ घातल्‍याने तुलनेने उत्‍पादन कमी झाल्‍याचे कोर्लईच्या महिला विक्रेत्या लिबान वेगस यांनी सांगितले.
सध्या बाजारात ५० ते ६० महिला विक्रेत्यांनी प्रत्‍येकी सात ते आठ क्‍विंटल रताळी विक्रीसाठी आणली आहेत. दर्जानुसार मोठ्या रताळ्यांचा प्रती किलो भाव १०० रुपये, मध्यम आकारातील रताळी ८० रुपये तर लहान रताळी ६० रुपये किलोने विक्री होत असल्‍याचे ७२ वर्षीय शेतकरी कुस्सात वेगस यांनी सांगितले.

नगरपालिकेकडून विक्रेत्‍यांसाठी सुविधा
मुरूडच्या रताळी बाजाराला शंभर वर्षांहून अधिक परंपरा असून कोर्लईच्या समाजाने आजही ती अबाधित ठेवली आहे. विक्रेत्‍यांसाठी मुरूड नगर परिषदेतर्फे दरवर्षी लाइटिंगसह मंडप उभारणी करण्यात आली आहे.