वाडा, ता. ७ (बातमीदार) : तालुक्यातील कुडूस येथील झेड. ए. मेमन विद्यालयात तालुकास्तरीय विज्ञान प्रदर्शनाचे आयोजन करण्यात आले होते. या प्रदर्शनाला उत्स्फूर्त प्रतिसाद मिळाला. विज्ञान प्रदर्शनाचे उद्‍घाटन वाडा पंचायत समितीचे गटविकास अधिकारी राजेंद्र कुमार खताळ यांच्या हस्ते करण्यात आले. कार्यक्रमाच्या अध्यक्षस्थानी मुख्याध्यापिका मीनाक्षी सुनील होत्या. गटशिक्षणाधिकारी भगवान मोकाशी, कार्यक्रमाचे संयोजक नितीन जव्हारकर या वेळी उपस्थित होते. याप्रसंगी प्राथमिक स्तरावर ५५ प्रकल्प, माध्यमिक स्तरावर ३७ प्रकल्प प्रदर्शनात मांडले होते. शैक्षणिक साहित्य निर्मितीत प्राथमिक गट ९ प्रकल्प, माध्यमिक गट ४ प्रकल्प, परिचर स्पर्धा साहित्य २ प्रकल्प प्रदर्शनांत मांडण्यात आले होते. विज्ञान प्रदर्शनात तालुक्यातील ७८ शाळा सहभागी झाल्या.