नालासोपारा, ता. १४ (बातमीदार) : वसईचे तुंगारेश्वर हे घनदाट अभयारण्य आहे. या तुंगारेश्वर जंगलात महादेवाचे मंदिर असून, लाखो भाविक दर्शनासाठी जात असतात. याच तुंगारेश्वर जंगलात वसईतील तीन ज्येष्ठ नागरिकांनी दोन दिवस परिक्रमा करून ७० किलोमीटरचे अंतर पार करून, आजच्या तरुणाईपुढे एक नवा आदर्श घालून दिला आहे.
विठ्ठल आवारी, विजय अभ्यंकर आणि शशिकांत केणी अशी या परिक्रमा पार केलेल्या तीन ज्येष्ठांची नावे असून हे तिघेही ६५ ते ७० वयोगटातील आहेत. या तिघांनाही गिर्यारोहणाची अत्यंत आवड आहे. ही आवड जोपासणारे हे तिघे आहेत. या परिक्रमेदरम्यान सुंदर निखळ निसर्ग, भारद्वाज पक्ष्यांसह अनेक जातीच्या विविध पक्ष्यांचे दर्शन त्यांना घडल्याचे ते सांगत आहेत.
आजच्या धकाधकीच्या आणि धावपळीच्या जीवनात प्रत्येकाचे आयुष्य हे सीमित झाले आहे. स्वतःसाठी वेळच शिल्लक नसल्याचा कांगावा अनेक जण करीत असतात. त्यातूनच अनेक आजारांना निमंत्रण मिळत आहे, पण प्रत्येकाने आपले आयुष्य सुंदर आणि निरोगी जगण्यासाठी स्वतःसाठी वेळ काढून निश्चित निसर्गाचा आस्वाद घ्यावा, असे आवाहनही या तीन ज्येष्ठ नागरिकांनी केले आहे.