नवी मुंबई, ता. १४ (वार्ताहर) : दिघा एमआयडीसीतील यादव नगरमध्ये राहणाऱ्या एका रिक्षाचालकाचा त्याच्या मुलाच्या वाढदिवशीच मृत्यू झाल्याची घटना एमआयडीसी रस्त्यावर घडली. त्याचे भरधाव रिक्षावरील नियंत्रण सुटल्याने सदरची रिक्षा रस्ता दुभाजकावर धडकून त्याचा मृत्यू झाला होता. या अपघाताला तो जबाबदार असल्याचे आढळून आल्याने रबाळे एमआयडीसी पोलिसांनी त्याच्याविरोधात गुन्हा दाखल केला.

विकास पन्नालाल सरोज (वय ३४) दिघा एमआयडीसीतील यादव नगर परिसरात पत्नी व दोन मुलांसह राहत होता. विकासच्या मुलाचा मंगळवारी (ता. १०) वाढदिवस असल्याने तो रात्री मुलाच्या वाढदिवसाचा केक कापल्यानंतर मित्राला रिक्षाने सोडण्यासाठी गेला होता. त्याला सोडून तो एमआयडीसी रस्त्याने घरी परतताना भरधाव वेगात असलेल्या रिक्षावरील त्याचे नियंत्रण सुटले. त्यामुळे त्याची रिक्षा रस्ता दुभाजकावर धडकल्याने तो गंभीर जखमी झाला होता. त्यामुळे त्याला कळवा येथील छत्रपती शिवाजी महाराज रुग्णालयात दाखल करण्यात आले; मात्र तेथील डॉक्टरांनी त्याला मृत घोषित केले. त्याने बेदरकारपणे वाहन चालवून दुभाजकाला धडकून अपघात झाल्याचे पोलिस तपासात आढळून आल्याने बुधवारी (ता. ११) गुन्हा दाखल करण्यात आला.