नेरळ, ता. ८ (बातमीदार) : कर्जत-कल्याण राज्य मार्गावर आज (ता. ८) सकाळी एका तरुणाला ट्रकने धडक दिल्याने त्याचा जागीच मृत्यू झाला. या प्रकरणी कर्जत पोलिसांनी ट्रकचालकाला वाहनासहित ताब्यात घेतले. किरवली ग्रामपंचायत हद्दीतील बामणोली येथे राहणारा गणेश शांताराम पवार (वय २७) हा तरुण मोलमजुरी करून कुटुंबाची गुजराण करीत होता. आज सकाळच्या सुमारास कामासाठी घरातून बाहेर पडला होता. आठ वाजण्याच्या सुमारास कर्जतहून कल्याण दिशेने निघालेल्या ट्रकने गणेशला डी मार्टच्या पुढील वळणावर मागून धडक दिली. त्याच्या डोक्याला गंभीर दुखापत झाल्याने त्याचा मृत्यू झाला. अपघातानंतर पळून जाण्याच्या बेतात असलेल्या ट्रकचालकाला कर्जत पोलिसांनी ताब्यात घेतले. गणेश याचा मृतदेह कर्जत उपजिल्हा रुग्णालयात नेण्यात आला.