सकाळ वृत्तसेवा

मुंबई, ता. ८ : जुहू येथील इस्कॉन मंदिरात आज सकाळी एक निनावी दूरध्वनी आला. ‘सब तयार हैं ना, मैं १७ तारीख को आ रहा हु, युसूफ को मिल लिया? शक हो गया’, अशा संभाषणानंतर मंदिरातील सर्वेश कुमार यांची मात्र घबराट उडाली. दहशतवादी हल्ल्याच्या भीतीने त्यांनी तात्काळ पोलिसांना याची माहिती दिली. पोलिसांनी तपास सुरू केला. आठ तासांच्या चौकशीनंतर कॉल करणाऱ्या व्यक्तीला भोपाळला (मध्य प्रदेश) फोन लावायचा होता; मात्र तो चुकून (क्रॉस कनेक्शन) जुहू इस्कॉन मंदिरात लागल्याने पोलिसांना डोक्यावर हात मारण्याची वेळ आली.

मुंबई नेहमी दहशतवाद्यांच्या रडारवर असते. शिवाय शहरावर दहशतवादी हल्ल्याच्या धमक्यांचे निनावी फोन वारंवार येत असतात. त्यामुळे पोलिसांसह सामान्य नागरिकही सतर्कता बाळगतात. जुहूमधील इस्कॉन मंदिरात राहणारे सर्वेश कुमार यांना बुधवारी (ता. ८) सकाळी एकाने फोन केला. समोरील व्यक्तीचे संभाषण संशयास्पद वाटल्याने सर्वेश कुमार यांनी तात्काळ मुंबई पोलिसांच्या मुख्य नियंत्रण कक्षाशी संपर्क साधून याची माहिती दिली. पोलिसांनीही तात्काळ तपासाला सुरुवात केली. आठ तासांच्या चौकशीनंतर कथित दहशतवादी कारवाई संदर्भात कॉल हा ‘क्रॉस कनेक्शन’ असल्याचे निष्पन्न झाले.

पोलिसांची धावपळ
सर्वेश कुमार यांना कॉल करणाऱ्या व्यक्तीला भोपाळ येथे संपर्क करायचा होता; मात्र तो चुकून जुहू इस्कॉन टेम्पलचे कुमार यांना लागला. चुकीचा कॉल लागल्याचे समजताच समोरच्या व्यक्तीने कॉल कट केला. मात्र या क्रॉस कनेक्शन आणि चुकीच्या अंदाजामुळे पोलिस यंत्रणांची चांगलीच धावपळ उडाली.