सकाळ वृत्तसेवा
ठाणे, ता. ९ : नौपड्यातील तळ अधिक ३ मजली असलेल्या वसंत को. ऑप. हाऊसिंग सोसायटी या इमारतीच्या भिंतीला व पिलरला अनेक ठिकाणी तडे गेले आहेत. ती इमारत अत्यंत धोकादायक स्थितीत असून त्यामध्ये सद्यस्थितीत कोणीही रहिवाशी राहत नाहीत; मात्र तळ मजल्यावर असणाऱ्या गाळ्यांमध्ये पिठाची गिरणी सुरू असल्याची माहिती आपत्ती व्यवस्थापन कक्षाने दिली.
गुरुवारी (ता. ९) सकाळी १० च्या सुमारास ४७ वर्षे जुनी असलेल्या या इमारतीच्या भिंतीला व पिलरला अनेक ठिकाणी तडे गेल्याची माहिती माजी नगरसेवक सुनेश जोशी यांनी आपत्ती व्यवस्थापन कक्षाला दिली. ही इमारत अत्यंत धोकादायक स्थितीत आहे. इमारतीच्या प्रत्येक मजल्यावर प्रत्येकी दोन फ्लॅट असून तळाला एक गाळा आहे. या घटनेची माहिती मिळताच घटनास्थळी आपत्ती व्यवस्थापन अधिकारी व कर्मचारी, नौपाडा-अतिक्रमण विभागाचे कर्मचारी, अग्निशमन दलाचे जवान यांनी धाव घेतली. सुदैवाने यामध्ये कोणालाही दुखापत झालेली नाही. धोकादायक इमारतीमध्ये सद्यस्थितीत कोणीही रहिवाशी राहत नसून, तळ मजल्यावर असणाऱ्या गाळ्यांमध्ये पिठाची गिरणी सुरू असून, त्यामध्ये राजू खरवार हा एक कर्मचारी काम करत असल्याची माहिती आपत्ती व्यवस्थापन कक्षाने दिली.