मुंबई, ता. ९ ः चांगल्या क्रेडिट स्कोर, नॉर्मल बीएमआय इंडेक्स, संपूर्ण लसीकरण आदी चांगल्या सवयी अंगी बाणवलेल्या नागरिकांना विमा पॉलिसीवर साडेसात टक्क्यांपर्यंत सवलत देण्याचा निर्णय रिलायन्स जनरल इन्शुरन्सतर्फे घेण्यात आला आहे. लोकांना आर्थिक शिस्त लागावी व त्यांना चांगल्या सवयी लागाव्यात हा यामागील उद्देश आहे. ज्या नागरिकांचा क्रेडिट स्कोर व क्रेडिट रेकॉर्ड चांगला आहे त्यांना विमा पॉलिसीच्या हप्त्यात साडेसात टक्के सवलत मिळेल.

नवीन विमा पॉलिसी खरेदी करणारे किंवा सध्याच्या रिलायन्स हेल्थ इन्फिनिटी पॉलिसीचे नूतनीकरण करणारे ग्राहक या निर्णयाचा फायदा घेऊ शकतील. ग्राहकांनी आर्थिक शिस्त लावून घेण्यासाठी त्यांना प्रोत्साहित करण्याचा हेतू यामागे आहे, असे रिलायन्स इन्शुरन्सतर्फे सांगण्यात आले. त्याचप्रमाणे बॉडी मास इंडेक्स चांगला असलेल्या ग्राहकांनाही विमा हप्त्यांवर सवलत मिळेल. आपल्या पॉलिसीधारकांनी स्वतःचे आरोग्य चांगले ठेवावे, त्यासाठी वेगवेगळे मार्ग वापरावेत यासाठी त्यांना सवलत देण्यात येत आहे. त्याचबरोबर कोविडचे दोन डोस किंवा बूस्टर डोस घेतलेल्या किंवा एचपी व्हॅक्सिन किंवा न्यूमोकोकल व्हॅक्सीन घेतलेल्या नागरिकांनाही विमा हप्त्यात सवलत मिळेल, असे रिलायन्स जनरल इन्शुरन्सतर्फे कळवण्यात आले आहे.