मुंबई, ता. ९ : मुंबईसह राज्यातील अनेक शहरांमध्ये जनआक्रोश मोर्चाच्या माध्यमातून द्वेष पसरवण्याच्या घटना वाढत आहेत; मात्र राज्यातील पोलिस दल या घटना गांभीर्याने घेत नसल्याचा आरोप महात्मा गांधींचे पणतू तुषार गांधी यांनी केला आहे. याबाबत त्यांनी पोलिस महासंचालक रजनीश सेठ यांना पत्र लिहून पोलिस प्रशासनाच्या उदासिनतेबाबत खंत व्यक्त केली आहे.
मुंबईतील हिंदू जनआक्रोश मोर्चाच्या प्रस्तावित रॅलीला रोखण्यासाठी सर्वोच्च न्यायालयात दाखल याचिकेवर सुनावणीदरम्यान न्यायमूर्तींनीही कारवाई न झाल्यामुळे खेद व्यक्त केला होता. कायद्याची अंमलबजावणी करणाऱ्या यंत्रणांची उदासीनता आणि दुर्लक्षामुळे न्यायमूर्तींनी नाराजी व्यक्त केले होती. स्वातंत्र्याच्या ७५ वर्षांनंतरही राज्यघटना आणि कायद्यापेक्षा पोलिस राजकीय नेत्यांची हुजरेगिरी करण्यास प्राधान्य देतात, हे लज्जास्पद बाब असल्याची टीका तुषार गांधी यांनी पोलिस महासंचालकांना लिहिलेल्या पत्रात म्हटले आहे.