कासा, ता. ११ (बातमीदार) : शनिवारी पहाटे चारच्या दरम्यान एका ट्रकला मागून प्रवाशी बसने धडक दिल्याने ट्रक पुलावर उलटल्याची घटना मुंबई-अहमदबाद महामार्गावर घडली. धडकेनंतर ट्रक उलटल्याने ट्रक मधील सामान महामार्गावर पसरले होते, त्यामुळे काही काळ वाहतूक कोंडी झाली. महामार्गावर मुंबईहून गुजरातकडे जाणाऱ्या वाहिनीवर धानिवरी पुलावर एमएच- ०४, सीए- ९९८२ या कागदी गठ्ठे घेऊन जाणाऱ्या ट्रकला पाठी मागून भरधाव येणाऱ्या जीजे-०३, सीटी- ५३९५ प्रवाशी बसने जोरदार धडक दिली. ओव्हर टेक करताना बसवरील नियंत्रण सुटल्याने हा अपघात घडला. ही धडक एवढी जोरदार होती की, या धडकेने पुढील ट्रक धानिवरी पुलावर उलटला, व या ट्रकमधील कागदी गठ्ठे महामार्गावर सर्वत्र पडल्याने मोठी वाहतूक कोंडी झाली. घटनेची माहिती मिळताच महामार्ग पोलिस व कासा पोलिसांनी घटनास्थळी पोहोचत अपघातग्रस्त वाहनांना बाजूस करण्याचे काम केले. त्यानंतर महामार्गावर पडलेल्या कागदाचे गठ्ठे पोलिसांनी मजुरांना बोलावून बाजूला करत वाहतूक कोंडी सोडवली. या अपघातात ट्रकचालकाच्या पायास गंभीर दुखापत झाल्याने त्याला धुंदलवाडी येथील वेदांत हॉस्पिटलमध्ये दाखल करण्यात आल्याची माहिती पोलिसांनी दिली.