वाशी : आशिया खंडातील सर्वात मोठी बाजारपेठ म्हणून ओळखल्या जाणाऱ्या मुंबई कृषी उत्पन्न बाजार समितीमध्ये भाज्यांची आवक सध्यातरी स्थिर आहे. मात्र, गेल्या काही दिवसांपासून उन्हाचा पारा चढू लागल्याने भाज्यांचे दरही आतापासून वाढण्यास सुरुवात झाली आहे. त्यामुळे बाजारात गवार प्रतिकिलो ७० रुपयांवर पोहोचली असून टोमॅटो ४० रुपयांवरून २० रुपयांवर आले आहेत.

तुर्भे येथील एपीएमसी बाजारात ६६५ भाजीपाल्यांच्या गाड्यांची आवक झाली आहे; तर फळ बाजारात कलिंगड, काळी व हिरवी द्राक्षे, परराज्यांतील सफरचंदांची दैनंदिन आवक वाढली आहे. अशातच फेब्रुवारी महिन्यातच मे महिन्यासारखा पारा चढला असल्याने रात्री वाढणारी उष्णता आणि सकाळी हवेत असणारा गारवा याचा फटका भाज्यांना बसत असल्याने भाव वाढल्याची माहिती घाऊक भाजी विक्रेत्यांनी दिली आहे.

एपीएमसीच्या घाऊक बाजारात मेथी- १६ रुपये, कांदापात- १५ रुपये, शेपू- २० रुपये, शिमला मिरची- २५ रुपये, मटार- २५ रुपये, भेंडी- ४५ रुपये, गवार- ७० रुपये, कोबी- १० रुपये, फ्लॉवर- १२ रुपये, टोमॅटो- १८ ते २० रुपये, कोथिंबीर २० रुपये जुडीने विकली जात आहे.

लिंबू ३०० रुपये शेकडा
फेब्रुवारी महिन्याच्या दुसऱ्या आठवड्यापासून हिवाळ्याच्या शेवटपर्यंत थंडीऐवजी उन्हाच्या झळा अधिक जाणवू लागल्या आहेत. उन्हापासून बचाव करण्यासाठी लिंबू-पाणी, रसाळ फळे, ज्यूसची मागणी वाढू लागली आहे. शहरातील अनेक रस्त्यावर लिंबू-पाणी विक्रेत्यांनी दुकाने थाटली आहे. एपीएमसीत ३०० रुपये शेकड्याने लिंबू विकला जात असून १० रुपये ग्लास असणारे लिंबू-पाणी १२ ते १५ रुपयांनी विकले जाते.

येत्या महिनाभर हवामान बदलाची स्थिती अशीच राहिल्यानंतर उन्हाळ्यापूर्वीच भाज्यांच्या दरांमध्ये देखील अशाच प्रकारे चढ-उतार सुरू राहण्याची शक्यता आहे. तसेच मार्च ते मे महिन्यात भाजीपाल्यांचे कमी उत्पादन घेतले जात असल्याने भाव वाढणार आहेत.
- अशोक शेळके, व्यापारी