मुंबई, ता. २२ : राज्यात मराठी चित्रपट, मालिका, ओटीटी याशिवाय विविध कार्यक्रमांसाठी फिल्मबाजार पोर्टल तयार करण्यात येणार असल्याची माहिती सांस्कृतिक कार्यमंत्री सुधीर मुनगंटीवार यांनी दिली.
फिल्मबाजार पोर्टल तयार करण्यासाठी सरकारकडून समिती गठित करण्यात आली आहे. या समितीत दादासाहेब फाळके चित्रनगरीचे व्यवस्थापकीय संचालक तथा अध्यक्षांसह स्वप्नील जोशी, संदीप घुगे, केतन मारू, संजय जाधव, महेश कोठारे यांचा समावेश असणार आहे. मराठी चित्रपट, विविध वाहिन्यांवरील मराठी मालिका, कार्यक्रम तसेच ओटीटीवरील मराठी चित्रपट-वेबसीरिजच्या निर्मितीसाठी पटकथा, लेखक, निर्माते, दिग्दर्शक, कलाकार, तंत्रज्ञ तसेच वित्त पुरवठादारांना एका व्यासपीठावर आणणे, त्यांच्यात समन्वय साधणे, आदींसाठी ही समिती काम करेल. त्याशिवाय राज्यातील स्वातंत्र्यसेनानी, समाजसुधारक, साहित्य-सांस्कृतिक क्षेत्रातील महनीय व्यक्तींच्या जीवनावर आधारित चित्रपट, मालिका, वेबसीरिज निर्मिती करण्यासाठी प्रयत्न करणे तसेच शासनाला अशा प्रकल्पासाठी आवश्यक सहकार्य आणि सल्ला देण्याचे कामही नियुक्त समिती करणार आहे.