सकाळ वृत्तसेवा
डोंबिवली, ता. २३ : डोंबिवली पश्चिमेतील जुनी डोंबिवली परिसरातील आशिष व्हिला येथे राहणाऱ्या कविता जाधव यांच्या घरी बुधवारी दुपारी चोरी झाल्याची घटना घडली आहे. कविता या नोकरी करत असून नेहमीप्रमाणे त्या बुधवारी सकाळी कामाला गेल्या होत्या. दरम्यान त्यांच्या बंद घराचा कडी कोयंडा तोडून चोरट्यांनी घरातील कपाटाचे लॉकर तोडून एक लाख ७१ हजार रुपये किमतीचे सोन्याचे दागिने, रोख रक्कम चोरून नेली आहे. कविता या दुपारी घरी आल्या असता त्यांना घरात चोरी झाल्याचे समजले. याप्रकरणी विष्णूनगर पोलिस ठाण्यात तक्रार दाखल करण्यात आली असून पोलिस तपास करीत आहेत. तर दुसऱ्या घटनेत डोंबिवली एमआयडीसीतील सितसन प्रोसेस कन्ट्रोल सिस्टिम कंपनीत चोरीची घटना घडली आहे. चोरट्याने रात्रीच्या वेळेस कंपनीच्या संरक्षक भिंतीवरून कंपनीत प्रवेश केला. त्यानंतर कंपनीतील एक लाख १० हजार रुपये किमतीचे साहित्य चोरून नेले आहे. शनिवारी रात्री ही चोरी झाली असून, कंपनीतील भांडार कक्षातील किमती साहित्य, सीसीटीव्ही नियंत्रकाची तोडफोड करुन चोरटा पळून गेला आहे. दुसऱ्या दिवशी कंपनीतील कर्मचाऱ्यांच्या चोरीचा प्रकार निदर्शनास आला. कंपनी कर्मचारी दत्ता काळे यांच्या तक्रारीवरुन मानपाडा पोलिस ठाण्यात याप्रकरणी तक्रार करण्यात आली आहे.