मुंबादेवी, ता. २ (बातमीदार) : राज्याचे आरोग्यमंत्री तथा धाराशिव (उस्मानाबाद)चे पालकमंत्री तानाजी सावंत चांगले काम करीत असतानाही जिल्ह्यातील निधीवाटपाबाबत दुजाभाव करीत असल्याचा आरोप भाजपचे आमदार राणा पाटील यांनी केला आहे. अशा स्वरूपाचा आरोप विद्यमान सरकारमध्ये असूनही केला जात असल्याने आमदार राणा पाटील हे नेमके कोणत्या आधारावर आणि का बोलत आहेत, असा सवाल धाराशिवचे शिवसेना जिल्हाप्रमुख दत्तात्रय साळुंखे यांनी पत्रकार परिषदेत उपस्थित केला.
साळुंखे म्हणाले, की यातील ७० टक्के निधी हा विविध योजनांवर खर्च झाला असून ३० टक्के निधी जिल्हाधिकारी यांच्‍याकडे शिल्लक आहे; मात्र तरीही भाजपचे विद्यमान आमदार राणा पाटील हे निधीवाटपात दुजाभाव झाल्याचा आरोप करीत असून यात काहीच तथ्य नाही, असे दत्तात्रय साळुंखे यांनी म्हटले. निधीवाटपात दुजाभाव केला जात असल्याचा आरोप करून पालकमंत्री सावंत यांना उद्धव ठाकरे यांच्या गटात परत प्रवेश करावा यासाठी तर हा खटाटोप केला जात नसावा ना, अशी शंकाही या वेळी दत्तात्रय साळुंखे यांनी उपस्थित केली.