उल्हासनगर, ता. १२ (वार्ताहर) : जागतिक महिला दिनानिमित्त उद्धव बाळासाहेब ठाकरे पक्षाच्या वतीने उल्हासनगरात आयोजित करण्यात आलेला सांस्कृतिक कार्यक्रम महिलांच्या विक्रमी गर्दीने हाऊसफुल्ल ठरला. यात विठ्ठल-रखुमाईच्या पेहरावात काढण्यात आलेली दिंडी अव्वल ठरली असून विजेत्यांना पारितोषिक देऊन सन्मानित करण्यात आले. कल्याण जिल्हाप्रमुख चंद्रकांत बोडारे, जिल्हा समन्वयक धनंजय बोडारे, माजी नगरसेविका शीतल बोडारे, वसुधा बोडारे यांच्या पुढाकाराने महिला दिनानिमित्त प्रभाग १५ मधील महिला-मुलींसाठी सांस्कृतिक कार्यक्रमांचे आयोजन करण्यात आले होते. प्रभागातील महिलांनी, मुलींनी महिनाभर सराव करून आणि सांस्कृतिक कार्यक्रमात थिरकून कलागुणांना वाव दिला. या वेळी उपजिल्हाप्रमुख राजेंद्र शाहू, शहर संघटक डॉ. जानू मानकर, ज्येष्ठ पत्रकार किरण सोनवणे, महिला आघाडीच्या उपजिल्हा संघटक अंजली राऊत, महिला आघाडीच्या शहर संघटक जया तेजी, विधानसभा संघटक मंगला पाटील, माजी नगरसेविका शीतल बोडारे, वसुधा बोडारे, पदाधिकारी बापू सावंत, प्रकाश माळी, विजय सावंत, उद्योगपती राजकुमार लेहराणी उपस्थित होते.