विरार, ता. २३ (बातमीदार) : वसई-विरार महापालिकेतील विविध कारणांनी कर्मचाऱ्यांवरील विविध आरोपांच्या चौकशीला आता वेग आला आहे. यात वर्ग- क व वर्ग- ड मधील तब्बल ३८ कर्मचाऱ्यांपैकी १७ प्रकरणी चौकशी पूर्ण झाली असून अहवाल प्राप्त झालेला आहे; तर १० प्रकरणांचा अंतिम निर्णय झाला असून, सात प्रकरणे प्रस्तावित असल्याची माहिती आस्थापना विभागातर्फे देण्यात आली आहे.
वसई-विरार महापालिकेतील वर्ग- क व वर्ग- डमधील ४२ हून अधिक कर्मचाऱ्यांची चौकशी रखडली होती. याबाबत पालिकेने विभागीय चौकशीसाठी सादरकर्ता व चौकशी अधिकाऱ्यांची नेमणूक केली होती. विविध कारणांसोबतच कामात हलगर्जी, निष्काळजीपणा केल्याचा ठपका ठेवत या कर्मचाऱ्यांची विभागीय चौकशी करण्याचे आदेश तत्कालीन आयुक्तांनी दिले होते; तर काही वरिष्ठ लिपीक व अधिकाऱ्यांवर लाच घेतल्याप्रकरणी आरोप होते. त्यांची लाचलुचपत प्रतिबंधक विभागामार्फत चौकशी सुरू होती. या अधिकाऱ्यांच्या विभागीय चौकशीचे आदेश देण्यात आलेले होते; मात्र चार वर्षांहून अधिक काळ या चौकशा रखडल्या होत्या. त्यामुळे संबंधित अधिकारी-कर्मचाऱ्यांचे निर्दोषत्व सिद्ध होत नसल्याने त्यांच्या निवृत्तिवेतन, पगारवाढ व पदोन्नती अशा बाबींवर गंडांतर आले होते. त्यामुळे ही चौकशी लवकर व्हावी अशी मागणी होत होती.
यामध्ये महापालिकेतील वर्ग- क व वर्ग- डमधील या ३८ कर्मचाऱ्यांत २० सफाई कर्मचाऱ्यांचा समावेश होता; तर ११ कर्मचाऱ्यांत वाहनचालक, आरोग्य निरीक्षक, अधीक्षक व वरिष्ठ लिपिकांचा समावेश आहे. उर्वरित अन्य ११ कर्मचाऱ्यांची लाचलुचपत प्रतिबंधक विभागामार्फत चौकशी सुरू होती. लाचलुचपत प्रतिबंधक विभागामार्फत चौकशी सुरू असलेल्या अधिकाऱ्यांच्या विभागीय चौकशीकरिता पालिकेने काही सेवानिवृत्त अधिकारी नियुक्त केलेले आहेत.