नालासोपारा, ता. २७ (बातमीदार) : नालासोपाऱ्यामध्ये अमली पदार्थ विक्रीसाठी आलेल्या एकाला अटक करण्यात आली. त्याच्याकडून १२६ ग्रॅम वजनाचे २५.२० लाख रुपयांचे एमडी (मॅफेड्रॉन) हा अमली पदार्थ जप्त करण्यात पोलिसांना यश आले. संशयित आरोपी गीतेश अनंत प्रभू (रा. टिटवाळा) याच्याविरोधात तुलिंज पोलिस ठाण्यात गुन्हा नोंदवण्यात आला.

नालासोपारा पूर्वेतील सेंट्रल पार्क येथे एक व्यक्ती अमली पदार्थ विक्रीसाठी येणार असल्याची माहिती मिरा-भाईंदर, वसई-विरार पोलिस आयुक्तालयाच्या अमली पदार्थ विरोधी पथकाला मिळाली होती. त्यानुसार शनिवारी (ता. २५) सापळा रचला असता गणेश अपार्टमेंटजवळ एक व्यक्ती थैली घेऊन संशयितरीत्या उभा असल्याचे निदर्शनात आले. त्याला ताब्यात घेऊन पोलिसांनी झाडाझडती घेतली असता, त्याच्या बॅगमध्ये अमली पदार्थ असल्याचे समोर आले. पोलिसांच्या तपासणीत एमडी (मॅफेड्रॉन) नावाचे अमली पदार्थ असल्याचे समोर आले. तसेच त्याची बाजारभाव किंमत २५ लाख २० हजार रुपये असल्याचे पोलिसांनी सांगितले. त्यानंतर त्याच्याविरोधात अटकेची कारवाई करण्यात आली.