बोर्डी, ता. २८ (बातमीदार) : आधार कार्ड पॅन कार्ड व निवडणूक ओळखपत्र ३१ मार्च २०२३ पर्यंत लिंक अनिवार्य करण्यात आले आहे, पण याविषयी नागरिकांमध्ये गोंधळ उडाला आहे. या भागातील अनेक लोकांनी आधार कार्ड व पॅन कार्ड लिंक केलेले नसल्यामुळे ग्रामस्थ संभ्रमावस्थेत आहेत. ३१ मार्चपर्यंत पॅन कार्ड आणि आधार कार्ड लिंक करण्याची मुदत देण्यात आली आहे. त्यातच यापुढे निवडणूक ओळखपत्र लिंक करायचे असल्याने नक्की काय करावे, अशा द्विधा मनस्थितीत नागरिक भरकटत आहेत. दरम्यान, यासाठी एक हजार रुपये दंड आकारण्यात येत असल्यामुळे सर्वसामान्य माणसाला मोठा भुर्दंड पडत आहे. घरातील चार पाच माणसांचे आधार कार्ड पॅन कार्ड लिंक करायचे असल्यास एवढी मोठी रक्कम कुठून आणायची असा प्रश्न पडला आहे. दरम्यान, याबाबतची तांत्रिक माहिती उपलब्ध नसल्यामुळे ग्रामस्थ सायबर कॅफेवर गर्दी करू लागले आहेत.