खारघर, ता. २ (बातमीदार) : पनवेल महापालिका हद्दीत असलेल्या खासगी शाळा आणि महाविद्यालयांमध्ये भरमसाठ शैक्षणिक शुल्क आकारले जाते. हे शुल्क सर्वसामान्यांना परवडणारे नसल्याने शाळा आणि महाविद्यालयात आर्थिकदृष्ट्या दुर्बल घटकांसाठी २५ टक्के आरक्षण ठेवून विद्यार्थ्यांचे शैक्षणिक शुल्क पनवेल महापालिकेने भरावे, अशा मागणीचे निवेदन शिवसेनेच्या (शिंदे गट) पदाधिकाऱ्यांनी पालिका आयुक्त गणेश देशमुख यांना दिले आहे.
पनवेल महापालिका क्षेत्रात मोठ्या प्रमाणात खासगी शाळा व महाविद्यालये आहेत. महापालिका आणि जिल्हा परिषेदेच्या शाळांची संख्या खूप कमी आहे. त्यामुळे पालकांना आपल्या पाल्यांना खासगी शाळेत दाखल करावे लागते. या शाळेचे शिक्षण सर्वसामान्य जनतेला खिशाला परवडण्यासारखे नाही. त्यामुळे पालिकेने शाळा आणि महाविद्यालयात आर्थिकदृष्ट्या दुर्बल घटकांसाठी २५ टक्के आरक्षण ठेवून शिक्षण घेणाऱ्या विद्यार्थ्यांचे शुल्क पनवेल महानगरपालिकेने भरावे, अशी मागणी निवेदनाद्वारे खारघरमधील शिवसेनेच्या पदाधिकाऱ्यांनी आयुक्त गणेश देशमुख यांच्याकडे केली आहे.