तुर्भे, ता. ६ (बातमीदार) : रामनवमीनंतर येणाऱ्या हनुमान जन्मोत्सव मोठ्या उत्साहात साजरा करण्यात आला. या वेळी दिवाळे गावातील भाविकांचे श्रद्धास्थान असलेल्या हनुमान मंदिरातही जन्मोत्सव सोहळा भक्तिभावात साजरा करण्यात आला.
हनुमान जयंती निमित्ताने दिवाळे गावातील मंदिरात फुलांची आकर्षक सजावट, मूर्तीला शेंदूरलेपन; तर मंदिराबाहेरही आकर्षक विद्युत रोषणाई करण्यात आली आहे. या सोहळ्यादरम्यान सकाळपासून भजन, ब्रास बॅण्ड पथकांचे सुश्राव्य वादन, आनंद सिंग आणि परिवार यांचे धार्मिक सुंदरकांड असे विविध कार्यक्रम मोठ्या उत्साहाने पार पडले. या भव्य सोहळ्यासाठी दिवाळे ग्रामस्थ आणि परिसरातील भाविकांनी दर्शनासाठी मोठ्या संख्येने हजेरी लावली होती. या वेळी हनुमान मंदिरापासून ते गाव प्रदक्षिणा पालखी (मिरवणूक) काढण्यात आली होती; तर सोहळ्याच्या दिवशी दोन्ही वेळेस महाप्रसादाची संपूर्ण व्यवस्था हनुमान सेवा संस्था व समस्त दिवाळे ग्रामस्थ मंडळ दिवाळे यांच्या वतीने करण्यात आली होती. या हनुमान जन्मोत्सव सोहळ्याचा अभिषेक व पूजेचे मानकरी म्हणून गावातील बोस कुटुंबीय (वळकरी) यांना देण्यात आला होता.
------------------------------------
हनुमानाच्या मूर्तीस महाअभिषेक, हनुमान चालिसा पाठ, रामनामाचा जप व आरती करून विधिवत पूजा करण्यात आली. याचबरोबर सूर्योदयाच्या वेळी उपस्थित भाविकांच्या उपस्थितीत पुष्पवृष्टी करून व पाळणा हलवून संकटमोचन ‘हनुमान की जय, जय श्रीराम’च्या जयघोषातील भक्तिमय वातावरणात हनुमान जन्मोत्सवाचा सोहळा पार पडला.