पालिकेच्या शाळा होणार सुरक्षित
विद्यार्थ्यांच्या सुरक्षेसाठी आता सीसी टीव्हीचा वॉच

सकाळ वृत्तसेवा
मुंबई, ता. १० ः मुंबई महापालिकेच्या शाळांमधील विद्यार्थी आणि आवार सुरक्षित होण्यासाठी सीसी टीव्ही कॅमेरे बसवण्याचा निर्णय पालिका प्रशासनाने घेतला आहे. त्यानुसार सर्व शाळांच्या आवारात सीसी टीव्ही कॅमेरे लावण्यात येणार आहेत.
पालिकेच्या नर्सरी ते दहावीपर्यंतच्या ११५० शाळांमध्ये तीन लाखांपेक्षा अधिक विद्यार्थी शिक्षण घेत आहेत. आता इंग्रजी सीबीएसई आणि आयसीएसई बोर्डाच्या शाळा पालिकेने सुरू केल्या आहेत. ‘मुंबई पब्लिक स्कूल’ नावाने त्या सुरू आहेत. पालिकेच्या शाळांमध्ये आठ भाषांमध्ये शिक्षण दिले जाते.
पालिकेच्या अनेक शाळांमध्ये सुरक्षा व्यवस्थेचा अभाव आहे. स्थानिक गुन्हेगारी प्रवृत्तीच्या व्यक्तीचा वावरही शाळांच्या आवारात असतो. पालिकेतर्फे विद्यार्थ्यांच्या सुरक्षेबाबतच्या उपाययोजना राबवण्यात येत असून एक कोटी रुपयांतून शाळांच्या आवारात सीसी टीव्ही कॅमेरे लावण्याचा निर्णय घेण्यात आला आहे.
पालिका शाळांतील विद्यार्थी, शिक्षक, शाळेचा परिसर आणि इतर सुविधा सुरक्षित ठेवण्याचा प्रयत्न करण्यात येत आहे. त्यासाठी पालिकेने कार्यकारी अभियंता (विद्युत व यांत्रिकी) प्रकल्प व्यवस्थापक सल्लागारांची नियुक्ती केली आहे. सीसी टीव्हीसाठी एक कोटी रुपये इतका खर्च केला जाईल, अशी माहिती शिक्षण अधिकाऱ्यांनी दिली.