खारघर, ता. १२ (बातमीदार) : खारघरमधील सेक्टर १६ आणि १७ मधील पाणथळ आणि खारफुटी परिसरात स्वच्छता मोहीम राबवून ७०० किलो प्लास्टिकचा कचरा गोळा करून पालिकेच्या घनकचरा विभागाकडे देण्यात आला आहे. या मोहिमेत खारघर, नेरूळ, सीबीडी, सानपाडा, पनवेल परिसरातील पन्नासहून अधिक पर्यावरणप्रेमी सहभागी झाले होते.
खारघर, सेक्टर आठ, दहा तसेच सिडकोच्या सेक्टर सोळा वास्तुविहार-सेलिब्रेशन गृहनिर्माण सोसायटीच्या मागील बाजू तसेच संजीवनी इंटरनॅशनल स्कूलकडून रांजणपाडा, ओवेपेठ गावाकडे जाणाऱ्या रस्त्यालगत जवळपास तीन किलोमीटर खारफुटी आणि पाणथळ जमीन आहे. या जमिनीवर काहींनी अतिक्रमण करून झोपड्या उभारल्या आहेत. पाणथळ जागी हिवाळ्यात देश-विदेशातील स्थलांतरित पक्ष्यांची रेलचेल असते; पण या परिसरात जमिनीवर मोठ्या प्रमाणात रिकाम्या पाण्याच्या तसेच दारूच्या बाटल्या, जैविक कचरा असल्याने पर्यावरण धोक्यात आले आहे.
------------------------------
‘या’ संस्थांचा उल्लेखनीय सहभाग
खारघर वेटलँड अँड हिल ग्रुप, मुंबई प्लॉगर्स, रोटरी क्लब ऑफ खारघर, लायन्स क्लब ऑफ सीबीडी, इख्तियार, डिव्हाईन फाऊंडेशन, फिशरमेन ग्रुप अशा विविध गटातील पर्यावरणप्रेमींनी एन्व्हायर्नमेंट लाइफ फाऊंडेशनने हा उपक्रम राबवून ७०० किलो घनकचरा गोळा केला आहे.
-----------------------------------------------------
खारफुटीच्या पट्ट्यात डेब्रिज टाकण्यात आल्याचे दिसून आले. तसेच खारफुटी परिसरात बंधारा आणि बेकायदा झोपड्यांजवळून दारूच्या बाटल्या गोळा केल्या आहेत. त्यामुळे खारफुटीच्या संरक्षणासाठी मोहिमेत सहभागी झालो.
- धर्मेश बारई, संस्थापक, खारफुटी सफाई सैनिक
--------------------------------------
खारघरला निसर्गाने पाणथळ, खारफुटी परिसर दिला आहे. खारफुटी भागात टाकण्यात आलेला जैविक कचरा परिसर खराब करीत आहे. तसेच थर्माकोलसह दारूच्या बाटल्या, प्लास्टिकसह मोठ्या प्रमाणात कचरा टाकण्यात आला आहे.
- ज्योती नाडकर्णी, पर्यावरणप्रेमी