उल्हासनगर, ता. १६ (वार्ताहर) ः भारत सरकारने जाहीर केलेली पदके उल्हासनगर महापालिकेतील अग्निशमन दलाच्या जवानांना आयुक्त अजीज शेख यांच्या हस्ते शनिवारी (ता. १५) प्रदान करण्यात आली. तत्पूर्वी राष्‍ट्रीय अग्निशमन दिनानिमित्त १९४४ च्या आगीत शहीद झालेल्या हुतात्म्यांना मानवंदना देण्यात आली. यात ६६ जवान शहीद झाले होते.

अग्निशमन दिनानिमित्ताने अग्निशमन दलाच्या आवारात आयोजित करण्यात आलेल्या कार्यक्रमात आयुक्त अजीज शेख व इतर अधिकाऱ्यांनी हुतात्म्यांना मानवंदना दिली. तसेच, स्वातंत्र्याच्या अमृतमहोत्सवी वर्षानिमित्त भारत सरकारने २६ जानेवारी रोजी जाहीर केलेली पदके अग्निशमन दलाचे मुख्य अधिकारी बाळू नेटके यांच्यासह १० जवानांना प्रदान करण्यात आली. या कार्यक्रमाला आयुक्त अजीज शेख, अतिरिक्त आयुक्त डॉ. करुणा जुईकर, जमीर लेंगरेकर, मुख्यालय उपायुक्त अशोक नाईकवाडे, उपायुक्त डॉ. सुभाष जाधव, मुख्यलेखाधिकारी किरण भिलारे, मुख्य लेखा परीक्षक शरद देशमुख, प्रशासनाधिकारी अशोक मोरे, जनसंपर्क अधिकारी छाया डांगळे, भांडार विभागप्रमुख अंकुश कदम आदी उपस्थित होते. तसेच पालिकेच्या प्रांगणात असलेल्या डॉ. बाबासाहेब आंबेडकर यांच्या पूर्णाकृती पुतळ्यास आयुक्त अजीज शेख, अतिरिक्त आयुक्त डॉ. करुणा जुईकर, जमीर लेंगरेकर यांनी जयंतीनिमित्त पुष्पहार अर्पण केले.