सकाळ वृत्तसेवा
मुंबई, ता. १६ : मध्य रेल्वेच्या १७० वर्षपूर्तीनिमित्त मुंबईतील सर्व प्रवासी संघटनांकडून रेल्वे प्रवाशांच्या सुरक्षित, सुखकर, आरोग्यदायी प्रवासासाठी सर्वेक्षण करण्यात आले होते. या ऑनलाईन सर्वेक्षणात ७६.७ टक्के प्रवाशांनी वातानुकूलित लोकलला सुरक्षित, सुखकर, आरोग्यदायी प्रवासासाठी पसंती दिली आहे.
मुंबईकरांचा रेल्वे प्रवास सुखकर आणि सुरक्षित व्हावा, यासाठी रेल्वे प्रवाशांकडून ऑनलाईन सर्वेक्षणात प्रवासी संघटनांकडून करण्यात आले. या ऑनलाईन सर्वेक्षणात प्रवाशांना ‘तुम्ही नियोजित वातनाकूलित रेल्वेला पाठिंबा देता का,’ असा प्रश्न विचारण्यात आला होता. त्याला ७६.७ टक्के प्रवाशांनी पाठिंबा दिला; तर त्यातील ३९.८ टक्के प्रवाशांनी एसी लोकलचे भाडे हे प्रथम श्रेणी तिकिटाप्रमाणे असावे, अशी मागणी केली. प्रत्येक लोकल ट्रेनमध्ये फक्त एकच एसी डब्याच्या मागणीला तुम्ही पाठिंबा देता का, यावरही ७० टक्के प्रवाशांनी पाठिंबा दिला असून त्यापैकी ४५ टक्के जणांनी एसी लोकलचे भाडे हे प्रथम श्रेणी तिकिटाप्रमाणे असावे, अशी मागणी केली. मुंबईतील इतर वाहतुकीच्या साधनांपेक्षा रेल्वे प्रवास स्वस्त असल्याचे प्रवाशांनी मान्य केले असून बस, रिक्षा, टॅक्सीच्या मुंबईतील इतर वाहतुकीच्या तुलनेत रेल्वेचे भाडे खूपच कमी आहे, यावर ८७ टक्के प्रवाशांनी होकार दिला आहे.
...
१ ते ४ रेल्वे मार्ग लोकलसाठी राखीव ठेवा!
उत्तम सुरक्षिततेसाठी तुम्ही एकत्रित एसी आणि एकत्रित महिला कोचच्या बाजूने आहात का, याला ७१.२ टक्के प्रवाशांनी होकार दिला आहे. पाचवी व सहावी मार्गिका सुरू झाल्यानंतर लोकलला दररोज लेटमार्क लागतो. त्यामुळे १ ते ४ रेल्वे मार्ग लोकलसाठी राखीव ठेवण्यास ९४.२ टक्के जणांनी पाठिंबा दिला आहे. मुंबई रेल्वेतील सुधारणांबाबत ६५.४ टक्के मुंबईकर समाधानी आहेत. विकासकामांच्या मागणीत आडवे येणाऱ्यांवर कारवाई करण्याच्या मागणीला ८७.४ टक्के प्रवाशांनी पाठिंबा दिला आहे.