विक्रमगड, ता. २२ (बातमीदार) : जिजाऊ शैक्षणिक आणि सामाजिक संस्थेचे संस्थापक अध्यक्ष नीलेश सांबरे यांच्या वाढदिवसानिमित्त जिजाऊ महोत्सवाचे विक्रमगड तालुक्यातील झडपोलीच्या जिजाऊ नगरीत आयोजन करण्यात आले होते. यानिमित्त राज्यस्तरीय कबड्डी स्पर्धा आयोजित करण्यात आल्या होत्या. या स्पर्धेत राज्यभरातील १२ व्यावसायिक संघांनी सहभाग घेतला होता.
जिजाऊ चषकाचा अंतिम सामना आयएसपीएल युवा पलटण (४५ गुण) व भारत पेट्रोलियम (४० गुण) यांच्यामध्ये रंगला. अटीतटीच्या सामन्यात पाच गुणांनी युवा पलटण संघाने बाजी मारली. सामन्यांमध्ये अस्लम इनामदार याने दर्जेदार खेळ दाखवत दर्जा दाखवून दिला. अस्लम इनामदारला मालिकावीर म्हणून बाईक देण्यात आली; तर आकाश मुंडे यास उत्कृष्ट चढाईपट्टू म्हणून रेफ्रिजरेटर देऊन गौरवण्यात आले. लकी ड्रॉ कूपनद्वारे भाग्यवान प्रेक्षकाला सायकल देण्यात आली व बाकी विजेत्यांना आकर्षक बक्षिसे देण्यात आली.

-------------
आकर्षक बक्षिसे
युवा पलटण संघाला प्रथम पारितोषिक तीन लाख ३३ हजार ३३३ रुपये, भारत पेट्रोलियम संघाला द्वितीय पारितोषिक दोन लाख २२ हजार २२२ रुपये; तर जॉयकुमार ठाणे व ठाणे महानगरपालिका या दोन संघांना प्रत्येकी ७७ हजार ७७७ रुपये देण्यात आले. तसेच खास आकर्षण म्हणून महिलांचे कबड्डीचे सामने झाले. त्यामध्ये जी. के. पष्टे प्रतिष्ठान पालघर (४१ गुण) विरुद्ध प्रो ऑलम्पिया मुंबई (९ गुण) यांच्यामध्ये सामना झाला. त्यामध्ये ३२ गुणांनी पालघर संघाने विजय मिळवला.