भिवंडी (बातमीदार) : भिवंडी-कल्याण रस्त्यावरून दुचाकीस्वार जात असताना पाठीमागून स्कुटीवरून आलेल्या दोघांनी त्याचा मोबाईल खिशातून काढून धूम स्टाईलने चोरून नेल्याची घटना उघडकीस आली. या चोरीप्रकरणी अज्ञात चोरट्यांविरोधात कोनगाव पोलिस ठाण्यात गुन्हा दाखल करण्यात आला आहे. शहरातील टेमघर येथे राहणारा जालिंदर लक्ष्मण बळे हा ११ एप्रिल रोजी रात्री पावणेबारा वाजण्याच्या सुमारास पत्नी आणि मुलासह दुचाकीने उल्हासनगर येथील घरी जात होता. पिंपळघर येथील प्राणायू हॉस्पिटलजवळ साडीच्या दुकानासमोर पोहचला असता, त्याच्या पाठीमागून स्कुटीवरून आलेल्या दोन अज्ञात तरुणांनी त्याच्या दुचाकीजवळ येऊन जालिंदर याच्या खिशातील मोबाईल हातचलाखीने चोरून चोरटे पसार झाले. या चोरीच्या घटनेची नोंद कोनगाव पोलिस ठाण्यात करण्यात आली आहे.