सकाळ वृत्तसेवा
डोंबिवली, ता. १ : प्रवाशांच्या सोयीसाठी रेल्वे स्थानकात सरकत्या जिन्यांची सोय करण्यात येत आहे. डोंबिवली, ठाकुर्ली रेल्वे स्थानकातही सरकत्या जिन्यांची कामे सुरू आहेत. परंतु गेले काही महिन्यांपासून ही कामे थंडावली असल्याने त्याचा त्रास प्रवाशांना सहन करावा लागत आहे. सरकत्या जिन्यांसाठीची बांधकाम विभागाची कामे पूर्ण झाली आहेत, मात्र विद्युत विभागाकडून सरकत्या जिन्याची व्यवस्था झाली नसल्याने ही कामे रखडली असल्याचे रेल्वे अधिकारी सांगतात. दोन महिन्यांत पावसाळा सुरू होईल, रेल्वे स्टेशन परिसरातील सरकत्या जिन्यांची कामे कधी पूर्ण होणार या स्वरुपाचे ट्विट काही जागरुक नागरिकांनी रेल्वे प्रशासनास केले आहे. त्यावर रेल्वे प्रशासनाने मे महिन्यात काम पूर्ण होतील असे उत्तर त्यांना दिले आहे.
मध्य रेल्वे मार्गावरील डोंबिवली हे रेल्वे स्थानक गर्दीचे रेल्वे स्थानक आहे. या स्थानकात फलाट क्रमांक तीन आणि चारवर मध्यभागी असलेल्या ब्रीजला सरकता जीना बसविण्यात येणार आहे. गेल्या काही महिन्यांपासून या जिन्याचे काम सुरु असून त्यासाठी फलाटावर खड्डा खोदून ठेवण्यात आला आहे. या खोदकामामुळे रेल्वेतून फलाटावर उतरणाऱ्या प्रवाशांना अनेकदा कसरत करावी लागते. तसेच फलाटावरून गर्दीच्या वेळेस ये जा करतानाही त्रास सहन करावा लागतो. या खड्ड्यातील बांधकाम पूर्ण करण्यात आले आहे. विद्युत विभागाकडून सरकत्या जिन्याचे काम हाती घेण्यात येत नसल्याने पाच महिन्यांपासून प्रवासी सरकता जिन्याचे काम कधी पूर्ण होणार या प्रतीक्षेत आहेत. डोंबिवली सर्वाधिक गर्दीचे ठिकाण आहे हे माहिती असूनही या स्थानकातील जिन्याचे काम प्राधान्याने पूर्ण करण्यात येत नसल्याने प्रवासी नाराजी व्यक्त करत आहेत.
....
मे महिन्यात काम पूर्ण
ठाकुर्ली पूर्व रेल्वे स्थानकाच्या बाहेर सरकत्या जिन्याचे काम रेल्वे प्रशासनाने हाती घेतले आहे. हे काम अर्धवट स्थितीत आहे. जागरुक नागरिक मंदार अभ्यंकर यांनी नुकतेच याविषयी रेल्वे प्रशासनाला ट्विट केले आहे. दोन महिन्यांवर पावसाळा आला आहे. ठाकुर्ली स्टेशनची ही घसरगुंडी कधी सुरू होणार, असा सवाल त्यांनी रेल्वे प्रशासनाला केला आहे. तसेच त्याच्या आजूबाजूला दगड, माती, कचरा, काँक्रीटची पोती पडून आहेत असेही त्यांनी म्हटले आहे. त्यांच्या या ट्विटला रेल्वे प्रशासनाने उत्तर देताना मे महिन्यात याचे काम पूर्ण होईल असे उत्तर दिले आहे.