भिवंडी, ता.२८ (बातमीदार) : शहरात राहून पालघर जिल्ह्यातून वाहने चोरी करणाऱ्या चोरांना स्थानिक गुन्हे शाखेच्या पथकाने बेड्या ठोकल्या आहेत. श्रीकांत बाळू बागरवार (वय २७, रा. गोरसई), निशांत मंगेश हुकमाळी (वय २३, रा. धोंडावडवली) अशी अटक करण्यात आलेल्या वाहन चोरांची नावे आहेत. त्यांच्याकडून ७ गुन्ह्यांमधील ३ लाख ९५ हजार रुपये किमतीच्या ६ रिक्षांसह एक दुचाकी जप्त करण्यात आली आहे, तर त्यांच्या एका साथीदाराचा शोध गुन्हे शाखेचे पोलिस पथक घेत आहे.
नारपोली पोलिस ठाण्यात दाखल वाहन चोरीच्या घटनेचा समांतर तपास गुन्हे शाखा- घटक २ पोलिस पथक करत होते. दरम्यान, या वाहन चोरीच्या घटनेतील गुन्ह्याच्या अनुषंगाने दोन चोरटे शहरातील वंजारपट्टी नाक्यावर येणार असल्याची माहिती गुन्हे शाखा पथकास मिळाली होती. माहितीच्या आधारे पोलिसांनी सापळा रचत दोघांना अटक करत त्यांच्याकडून चोरीची दुचाकी जप्त केली. त्यानंतर अधिक चौकशीत त्यांनी सहा रिक्षा चोरी केल्याची माहिती पोलिसांना मिळाली. चोरट्यांनी त्यांचा अन्य एक साथीदार आकाश जयवंत पाटील (रा.वसई, पूर्व) याच्या सोबतीने वसई परिसरामध्ये रिक्षांची चोरी केल्याची कबुली दिली. आकाशवर पेल्हार आणि वालीव पोलिस ठाण्यात वाहन चोरीचे सहा गुन्हे दाखल असून गुन्हे शाखेचे पोलिस पथक त्याचा शोध घेत आहेत.