सकाळ वृत्तसेवा

मुंबई, ता. २९ : राज्य परिवहन महामंडळात महिलांना ५० टक्के सवलत दिल्यानंतर मुंबई मेट्रोमधून ज्येष्ठ नागरिक, दिव्यांग, तसेच विद्यार्थ्यांना सवलतीच्या दरात प्रवास करता येणार आहे. महामुंबई मेट्रो ऑपरेशन कॉर्पोरेशन लिमिटेड आणि एमएमआरडीए यांच्यातर्फे १ मे महाराष्ट्र दिनापासून २५ टक्के सवलत मिळेल, अशी घोषणा मुख्यमंत्री एकनाथ शिंदे यांनी केली आहे. ‘मुंबई १’ नॅशनल कॉमन मोबिलिटी कार्ड वापरणाऱ्या
ज्येष्ठ नागरिक, विद्यार्थी आणि दिव्यांगांना ४५ ट्रिप किंवा ६० ट्रिपसाठी ही सवलत मिळणार आहे.

‘ज्येष्ठ नागरिक, दिव्यांग आणि लहान मुलांच्या गरजा आणि सुरक्षितता लक्षात घेऊन आम्ही मुंबई मेट्रो नेटवर्क तयार केले आहे, त्यामुळे त्यांना या सुविधांचा जास्तीत जास्त लाभ मिळणे आवश्यक आहे. आम्ही यापूर्वी ज्येष्ठ नागरिकांना एसटी प्रवास मोफत केला आहे; तर महिलांनाही एसटी बसमधून ५० टक्के प्रवास सवलत दिली आहे. सामाजिक भावनेतून हे निर्णय आम्ही घेतले असून, मेट्रो प्रवासातील सवलतीमुळेही अधिक संख्येने लोक यातून प्रवास करतील,’ अशी मला आशा असल्याचे मुख्यमंत्री एकनाथ शिंदे यांनी सांगितले.

यांना मिळणार सवलत
मेट्रो प्रवासात २५ टक्के सवलतीची सुविधा ६५ वर्षांवरील ज्येष्ठ नागरिक, इयत्ता १२ वीपर्यंत शिकणारे विद्यार्थी आणि कायमस्वरूपी दिव्यांग व्यक्तींसाठी आहे. या ३ श्रेणीतील प्रवाशांना सवलतीसाठी काही कागदपत्रे सादर करावी लागणार आहेत. दिव्यांगांसाठी सरकारी, वैद्यकीय संघटनेचे प्रमाणपत्र, ज्येष्ठ नागरिकांसाठी वयाचा पुरावा आणि विद्यार्थ्यांसाठी पॅन कार्डसह (विद्यार्थी किंवा पालक पॅन) शाळा ओळखपत्र यांसारखी वैध कागदपत्रे आवश्यक आहेत.

अशी मिळेल सवलत
१) मेट्रो मार्गिका २ अ आणि ७ च्या स्थानकावरील तिकीट खिडकीत आवश्यक कागदपत्रे दिल्यावर सुविधा मिळू शकेल.
२) नवीन आणि पूर्वी खरेदी केलेल्या मुंबई- १ कार्डवरही सवलत असेल. तसेच याला ३० दिवसांची वैधता राहील.
३) मुंबई १ कार्ड रिटेल स्टोअर, पेट्रोल पंप आणि बेस्ट बस प्रवासादरम्यानदेखील वापरले जाऊ शकते व रिचार्जही करता येईल.