सकाळ वृत्तसेवा
अलिबाग, ता. २९ : जिल्ह्यात नऊ तालुक्यांमध्ये कृषी उत्पन्न बाजार समित्या अस्तित्वात आहेत. त्यापैकी महाड, रोहा, खालापूर, माणगाव, पनवेल या पाच तालुक्यांतील कृषी उत्पन्न बाजार समित्यांवर शेतकरी कामगार पक्ष, शिवसेना, राष्ट्रवादी काँग्रेस, काँग्रेस यांच्या महाविकास आघाडीचे उमेदवार बिनविरोध निवडून आले आहेत; तर काही जागांसाठी मतदान प्रक्रिया झालेल्या अलिबाग बाजार समितीवरही महाविकास आघाडीचे सर्व उमेदवार विजयी झाले. पेण, कर्जत आणि मुरूडमध्ये ३० एप्रिल रोजी मतदान होणार आहे.

शिवसेना, भाजपने एकत्र येऊन या निवडणुकीसाठी ताकद लावली होती; परंतु महाविकास आघाडीसमोर त्यांच्या एकाही उमेदवाराचा निभाव लागला नाही. मतदान होणाऱ्या पेण बाजार समितीच्या निवडणुकीकडे आता सर्वांचे लक्ष लागून राहिले आहे. पेणमधून शेकापकडून दोन वेळा आमदार म्हणून निवडून आलेले धैर्यशील पाटील यांनी भाजपमध्ये प्रवेश केला आहे. त्यांचे पेण बाजार समितीवर वर्चस्व आहे. त्यांच्यासह भाजपचे विद्यमान आमदार रवी पाटील यांचाही या बाजार समितीवर प्रभाव असल्याने भाजप या बाजार समितीमध्ये खाते उघडण्याची शक्यता आहे. जिल्ह्यातील नऊ कृषी उत्पन्न बाजार समित्यांमध्ये ९९ जागांसाठी १९७ उमेदवार रिंगणात होते. त्यापैकी ८८ जागांवर बिनविरोध उमेदवार निवडून आले आहेत; तर उर्वरित कृषी उत्पन्न बाजार समित्यांमध्ये ७८ उमेदवारांसाठी रविवारी मतदान होत आहे.