मुरबाड, ता. १ (बातमीदार) : मुरबाड शहराच्या शिरपेचात मानाचा तुरा म्हणून शोभणारा १३० फूट उंच राष्ट्रध्वजाचे अनावरण सोमवारी (१ मे) आमदार किसन कथोरे यांच्या हस्ते करण्यात आले. राष्ट्रध्वज फडकत असताना पोलिसांनी सलामी दिली आणि राष्ट्रगीत संपताच उपस्थित नागरिकांनी वंदे मातरम, भारत माता की जय अशा घोषणा देत टाळ्यांच्या कडकडाटात या क्षणाचे स्वागत केले. यावेळी फटाक्यांची आतषबाजी करण्यात आली.
मुरबाड शहराच्या तीन हात नाका येथे हा ध्वजस्तंभ उभारण्यात आला आहे. आमदार किसन कथोरे यांच्या स्थानिक विकास निधीतून हा उंच ध्वजस्तंभ उभारण्यात आला आहे. के फ्लॅग फाऊंडेशनचे राकेश बक्षी, मुरबाड नगर पंचायतीचे मुख्याधिकारी मनोज म्हसे, सार्वजनिक बांधकाम विभाग उप अभियंता कैलास पतंगराव यांनी या स्तंभ उभारणीसाठी सहकार्य केले. या कार्यक्रमाचे प्रास्ताविक मुरबाड नगर पंचायतीचे नगराध्यक्ष राम दुधाळे यांनी केले. यावेळी १०३ वर्षाचे वयोवृद्ध नागरिक पांडुरंग विशे यांनी आपले मनोगत व्यक्त केले. यावेळी आमदार किसन कथोरे यांनी महाराष्ट्रात कोणत्याही नगर पंचायत हद्दीत एवढा मोठा ध्वजस्तंभ उभारण्यात आला नाही, असे सांगितले. या कार्यक्रमासाठी नगर पंचायतीचे नगरसेवक, भाजप कार्यकर्ते तसेच शहर व परिसरातील नागरिक मोठ्या संख्येने उपस्थित होते.
....
मुरबाड : शहरातील तीन हात नाका येथे १३० फूट उंच ध्वजस्तंभ उभारण्यात आला आहे.