मुंबई, ता. १ : बहुचर्चित बारसू प्रकल्पाबाबत आंदोलनकर्त्यांचा गैरसमज दूर झाला तरच रिफायनरी प्रकल्पाचा अंतिम निर्णय घेऊ, अशी ग्वाही राज्याचे उद्योगमंत्री उदय सामंत यांनी राष्ट्रवादी काँग्रेसचे अध्यक्ष शरद पवार यांना दिली.
बारसू येथील रिफायनरी आंदोलकांनी शरद पवार यांची नुकतीच भेट घेतली होती. त्यानंतर रविवारी मुख्यमंत्री एकनाथ शिंदे आणि पवार यांच्यात झालेल्या चर्चेनुसार सोमवारी सामंत यांनी पवार यांच्याकडे सरकारची भूमिका स्पष्ट केली. पवार यांच्या सिल्व्हर ओक या निवासस्थानातून बाहेर आल्यानंतर सामंत म्हणाले, की प्रकल्पाबाबत राज्य सरकारची भूमिका आणि तेथील वस्तुस्थिती काय आहे हे पवार यांना सांगितले. शेतकऱ्यांचे रिफायनरीसंदर्भातील काही गैरसमज आहेत. ते कशा पद्धतीने दूर करता येतील यासंदर्भात या भेटीत चर्चा झाली.
बारसू प्रकल्पात शेतकऱ्यांवर कोणत्याही परिस्थितीत अन्याय होणार नाही. शेतकऱ्यांशी चर्चा करूनच हा प्रकल्प पुढे नेला जाईल. शासन आंदोलकांच्या प्रमुखांशी बोलायला तयार आहे. स्थानिकांशी बोलूनच पुढील निर्णय घेतला जाईल. कोणासोबतही जबरदस्ती केली जाणार नाही, असेही त्यांनी सांगितले.
...