बदलापूर, ता. २ (बातमीदार) : रेल्वे स्थानक आणि बाजार परिसरात फेरीवाल्यांनी अतिक्रमण केल्याने पादचाऱ्यांचे हाल होत होते. या प्रकरणी पदपथ मुक्त करण्यासाठी मनसेच्या पदाधिकाऱ्यांनी पालिका प्रशासनाला ३० एप्रिलपर्यंत कारवाईसाठी अल्टिमेटम दिला होता. त्यानुसार शहराच्या पूर्व आणि पश्‍चिम बाजारपेठेतील फेरीवाल्यांना हटवण्यात आले. त्यामुळे बदलापूरच्या पदपथ आणि रस्त्यांनी मोकळा श्वास घेतला आहे. मात्र दुसरीकडे मंगळवारी (ता. २) फेरीवाल्यांनी बदलापूर पालिकेला घेराव घातला.

२ मे रोजी रस्त्यावर उतरणार, अशी ठोक भूमिका मनसेने घेतली होती. त्यानुसार आज शहरातील शक्तिप्रदर्शन करण्यात आले. आपला आवाज पालिकेत पोहचला असून, आता फेरीवाल्यांचा कायमचा बंदोबस्त करत त्यांना पर्यायी जागा द्यावी; अन्यथा आम्हाला पुन्हा रस्त्यावर उतरावे लागेल, अशी भूमिका मनसे महिला शहराध्यक्षा संगीता चेंदवणकर यांनी मांडली. दुसरीकडे कारवाई केलेल्या फेरीवाल्यांनी, आम्ही आता जगायचे कसे? मालविक्रीसाठी कर्ज काढून आणतो, त्या वस्तू विकायच्या कशा? पर्यायी जागा देण्याचे आश्‍वासन दिले, मात्र अद्याप जागा दिली नाही, आमचे पोट या व्यवसायावर भरते तर आम्ही करायचे काय? असा सवाल उपस्थित करत फेरीवाल्यांनी पालिकेला घेराव घातला. या प्रकरणी लवकरच विचार करून निर्णय घेऊ, अशी भूमिका मुख्याधिकारी योगेश गोडसे यांनी मांडली.