ठाणे, ता. २ : संजय गांधी राष्ट्रीय उद्यानातील येऊरमधील मामा-भांजे दर्ग्याशेजारी मोठ्या प्रमाणात अतिक्रमण झाले आहे. त्यामुळे हाकेच्या अंतरावर असलेल्या कान्हेरी हिल येथील भारतीय वायुसेनेच्या तळाला धोका निर्माण झाला आहे. त्यामुळे प्रशासनाने हे अतिक्रमण तत्काळ हटवावे; अन्यथा दर्ग्याशेजारीच शंकराचे मंदिर उभारण्याचा इशारा मनविसेचे राज्य सरचिटणीस संदीप पाचंगे यांनी संजय गांधी राष्ट्रीय उद्यानाचे संचालक व वनसंरक्षक यांना लेखी निवेदनाद्वारे दिला आहे.

संजय गांधी राष्ट्रीय उद्यान, येऊर वनक्षेत्रातील मामा-भांजे दर्ग्याच्या ठिकाणी गेल्या अनेक वर्षांपासून अतिक्रमण करण्यात आले आहे. भारतीय वायुसेनेच्या तळाच्या परिसरात मामा-भांजे दर्ग्यालगत काही लोक स्थलांतरित झाल्याने राष्ट्रीय सुरक्षिततेला धोका निर्माण झाला आहे. या गंभीर प्रकाराची दखल घेत, भारतीय वायुसेनेच्या अधिकाऱ्यांनी पत्रव्यवहार करून वन विभाग आणि जिल्हा प्रशासनाने येथील बेकायदा बांधकामे हटवण्याची मागणी प्रशासनाकडे केली. मात्र, प्रशासनाने सण असल्याचे निमित्त सांगून कारवाईत चालढकल सुरू केली. त्यामुळे, मनविसेने वनविभागाकडे निवेदन देऊन या अनधिकृत दर्ग्याचे बांधकाम त्वरित हटवण्याची मागणी केली आहे.