नवी मुंबई, ता. २ (वार्ताहर) : नेरूळ शिरवणे येथून उत्तर प्रदेशला जाण्यासाठी म्हणून निघालेला तरूण दीड महिन्यानंतरही बेपत्ता आहे. १४ मार्च रोजी हा तरुण घरातून बाहेर पडला होता. विजय राजदेव पाल (वय २५) असे या तरुणाचे नाव आहे. नेरूळ पोलिसांनी हरवल्याची नोंद घेतली आहे.

विजय पाल हा नेरूळच्या शिरवणे भागात कुटुंबासह राहत होता. त्याचे कुटुंबीय दूध डेअरीचा व्यवसाय करतात. विजयच्या कुटुंबीयांनी त्याच्या लग्नासाठी मुलगी पाहिली होती. मुलीला पाहण्यासाठी उत्तर प्रदेशात जाऊन येण्यास विजयला कुटुंबीयांकडून सांगण्यात आले होते. त्यानुसार तो १४ मार्च रोजी उत्तर प्रदेशातील त्याच्या मूळ गावी जाण्यास घराबाहेर पडला. मात्र, तो त्याच्या मूळ गावी पोहोचलाच नाही. त्याचा फोनदेखील बंद आहे. कुटुंबीयांनी नवी मुंबई, उत्तर प्रदेश या ठिकाणी त्याची शोधाशोध केली; मात्र त्याचा ठावठिकाणा लागला नाही. त्यामुळे २० मार्च रोजी कुटुंबीयांनी पोलिसात तक्रार केली. पोलिसांनी बेपत्ता असल्याची तक्रार नोंदवून घेतली असून शोध सुरू आहे.