सकाळ वृत्तसेवा

मुंबई, ता. २ : एसटी महामंडळाच्या ई-शिवनेरी बसच्या प्रवासी वाहतुकीला सोमवारपासून सुरुवात झाली. सायंकाळी ७ च्या सुमारास ठाणे-स्वारगेट आणि त्यानंतर स्वारगेट-ठाणे अशा दोन फेरींना प्रवाशांचा उत्तम प्रतिसाद मिळाल्याची माहिती महामंडळाने दिली. दोन्ही फेऱ्या मिळून सुमारे ८७ प्रवाशांनी प्रवास केला. त्यामधून ४२ हजारांचे उत्पन्न मिळाले. जसजशा बस सेवेत दाखल होतील त्याप्रमाणे मुंबई-पुणे द्रुतगती मार्गावर ई-शिवनेरीची प्रवासी वाहतूक वाढेल, असा विश्वास अधिकाऱ्यांनी व्यक्त केला.

मुख्यमंत्री एकनाथ शिंदे यांनी सोमवारी इलेक्ट्रिक शिवनेरीचे लोकार्पण केल्यानंतर पहिली ई शिवनेरी बस ठाण्यातून पुण्यासाठी सोडण्यात आली होती. त्यानंतर मंगळवारी पुण्यातील स्वारगेट आगारातून ७ बस सोडण्यात आल्या असून, सर्व बसला प्रवाशांचा उत्तम प्रतिसाद असल्याचे स्वारगेट आगार व्यवस्थापक भूषण सूर्यवंशी यांनी सांगितले. एसटीच्या ताफ्यात दाखल होणाऱ्या इलेक्ट्रिक बसची संख्या जसजशी वाढेल, त्याप्रमाणे मुंबई-पुणे मार्गावरील डिझेल शिवनेरी बस कमी करून त्या ठिकाणी ई-शिवनेरी सोडण्यात येणार असल्याचे एसटी प्रशासनाकडून सांगण्यात आले.

ठाणे-पुणे मार्गावर दोन फेऱ्या पूर्ण झाल्या आहेत. पहिली फेरी सोमवारी ७ वाजण्याच्या सुमारास सोडली होती. प्रवाशांना पुष्पगुच्छ देण्यात आले होते. दोन्ही मार्गांवरील फेरीला प्रवाशांचा प्रतिसाद उत्तम असून, दररोज फेऱ्यांमध्ये वाढ होणार आहे.
- स्वप्नील अहिरे, आगार व्यवस्थापक, ठाणे