डोंबिवली - भाजपच्या कल्याण जिल्हा उपाध्यक्षांच्या जनसंपर्क कार्यालयावर भर दुपारी दगडफेक झाल्याची घटना घडली आहे. कल्याण पश्चिम येथील वालधुनी परिसरात संदीप सिंह यांचे भाजप जनसंपर्क कार्यालय आहे.

या कार्यालयावर तरुणांकडून दगडफेक करण्यात आली आहे. ही घटना सीसी टीव्हीमध्ये कैद झाली असून त्याआधारे महात्मा फुले चौक पोलिस ठाण्याचे पोलिस तरुणांचा शोध घेत आहेत. अचानक दगडफेक झाल्याने कोणाला काही समजले नाही.

दगडफेकीनंतर लगेचच हल्लेखोरांनी तेथून पळ काढला होता. या दगडफेकीच्या घटनेत कार्यालयाबाहेर उभ्या असलेल्या गाड्यांच्या काचा फुटून नुकसान झाले आहे. दगडफेक करणारे तरुण सीसी टीव्ही कॅमेऱ्यात कैद झाले आहेत. महात्मा फुले चौक पोलिसांनी घटनेचा तपास सुरू केला आहे.