नवी मुंबई - वीज देयक भरले नसल्याची थाप मारून एका सायबर चोराने खारघरमध्ये राहणाऱ्या एका ज्येष्ठ नागरिकाची तब्बल १ लाख ९९ हजारांची फसवणूक केली आहे. याप्रकरणी खारघर पोलिस ठाण्यात आयटी ॲक्टनुसार गुन्हा दाखल आहे.

खारघर सेक्टर- १० मध्ये राहणारे शंकर अय्यर (६२) यांना घरामध्ये बसले असताना एका सायबर चोरट्याने त्यांच्या मोबाईलवर संपर्क साधून घराचे वीज देयक भरले नसल्याचे सांगितले. तसेच अय्यर यांनी भरलेले लाईट बिल सिस्टीममध्ये दिसत नसल्याचे सांगून अपडेट करण्यासाठी २० रुपये ऑनलाईन पाठवण्यास सांगितले.

त्यानंतर अय्यर यांच्याकडून अॅप्लिकेशनचा पिन नंबर मागून घेत मोबाईलमध्ये प्रवेश करून त्यांच्या बँक खात्यातील १ लाख ४९ हजार रुपये, तर दुसऱ्या बँक खात्यातून ५० हजार रुपये काढून घेतले. याबाबतची माहिती अय्यर यांना मिळाल्यानंतर त्यांनी सायबर सेलकडे तक्रार दाखल केली आहे.