तुर्भे बातमीदार
वाशीतील फादर अॅग्नेल मल्टिपर्पझ स्कूलच्या ईशान विवरेकरने दुर्मिळ आजार असताना बारावीच्या परीक्षेत ६३.८३ टक्के गुण मिळवले आहेत. त्याच्या या यशात त्याच्या आई-वडिलांबरोबरच शिक्षकांनी केलेले सहकार्य जरी महत्त्वाचे असले, तरी ईशानने दाखवलेल्या इच्छाशक्तीच्या जोरावर सुयश मिळाल्याची प्रतिक्रिया त्याच्या आईने दिली आहे. ईशानने कम्प्युटर सायन्स इंजिनीयरिंगमध्ये करिअर करायची इच्छा असून त्याने सीईटीची परीक्षाही नुकतीच दिली आहे.
----------------------------------------------------
ईशान विवरेकर हा काही सामान्य मुलगा नाही. त्याचे ९० टक्के शरीर काम करत नाही. त्यामुळे त्याला नेहमी मदतीची गरज असते. त्याची आई नेहमी त्याच्यासोबत सावलीसारखी उभी असते. ईशानला ट्यूबरस स्क्लेरोसिस कॉम्प्लेक्स नावाचा एक दुर्मिळ आनुवंशिक आजार आहे. ज्यामुळे त्याच्या शरीराच्या वेगवेगळ्या भागांमध्ये कंद होतात. ज्यात मेंदूचा समावेश आहे. क्रोनिक किडनी डिसीजच्या सुरुवातीच्या टप्प्याशी संबंधित आहे. यामुळे ईशानला जन्मापासूनच बोलता येत नाही. त्यामुळे फक्त हातवारे करून तो इतरांशी संवाद साधत असतो. शारीरिक ताणामुळे त्याचे हातपाय सुन्न होतात आणि मग त्याला आधाराची गरज असते. त्याचे फुफ्फुस ५० टक्केच्या जवळपास काम करते. अशा शारीरिक अडचणीसह ईशानला ऑटिझम स्पेक्ट्रमवर आहे; मात्र अशी शारीरिक परिस्थिती त्याला यश मिळवण्यासाठी थांबवू शकलेली नाही. त्यामुळे २००८ पासून वाशीतील फादर ॲग्नेल या सर्वसामान्य मुलांच्या शाळेत तो शिकत आहे. महत्त्वाचे म्हणजे २०२१ मध्ये त्याच्या शारीरिक परिस्थितीमुळे त्याची एसएससी परीक्षा रद्द केली होती. तरीदेखील अंतर्गत शालेय परीक्षेच्या आधारे ईशानला ८५.६ टक्के गुण मिळाले होते.
----------------------------
तार्किक युक्तिवाद करण्याची शक्ती
ईशानने २०२१ मध्ये फादर ॲग्नेल ज्युनियर कॉलेजमध्ये विज्ञान प्रवाहात प्रवेश घेतला. त्याची भौतिकशास्त्र आणि गणिताची गोडी जास्त वाढली; मात्र जानेवारी २०२२ मध्ये त्याला कोविडची लागण झाली. तो अशक्त झाला; मात्र नवीन काही तरी शिकण्याची त्याची हौस त्याला अभ्यासापासून परावृत्त करू शकली नाही. त्यामुळे शारीरिक स्थितीवर मात करत इच्छाशक्तीच्या बळावर त्याने यश मिळवले आहे. तार्किक युक्तिवाद आणि आश्चर्यकारक अशी स्मरणशक्ती आहे.
------------------------------------
अनेकांचे मोलाचे सहकार्य
महाराष्ट्र माध्यमिक आणि उच्च माध्यमिक परीक्षा मंडळाने पर्यवेक्षकाच्या देखरेखीखाली आणि वाचकाच्या परवानगीने पाठवलेल्या पाठिंब्याने पेपर टाईप करताना ईशानच्या आईला त्याच्या कोपराला, शारीरिक आधार देण्यासाठी परीक्षा हॉलमध्ये त्याच्यासोबत राहण्याची परवानगी दिली गेली होती. त्याची नाजूक शारीरिक स्थिती लक्षात घेता मुंबई बोर्डाचे विभागीय सचिव एस. आर. बोरसे यांनी त्याला सहकार्य केले. तसेच वाशीच्या आयसीएल कॉलेजच्या मुख्याध्यापकांनी खूप मदत केली.
----------------------------------------------
ईशानने मिळवलेल्या यशाचा त्याची आई म्हणून निश्चितच अभिमान आहे, पण ईशानच्या या यशात अनेकांचे मोलाचे योगदान आहे.
- नमिता विवरेकर, ईशानची आई