पालघर, ता. ३१ (बातमीदार) : राज्य सरकारने अपारंपरिक ऊर्जास्रोतांचा विकास घडवून आणण्यासाठी वेळोवेळी प्रोत्साहनात्मक धोरणे जाहीर केली आहेत. त्यानुसार शेतकऱ्यांच्या कृषीपंप वीजजोडण्यांचे विद्युतीकरण सौरऊर्जेद्वारे करण्यासाठी राज्य सरकार गेल्या काही वर्षांपासून स्वयंअर्थसहाय्यित, तसेच केंद्र सरकारच्या अर्थसाह्यातून विविध योजना राबवत आहे. त्याअंतर्गत केंद्र सरकारकडून देशभरात राबवण्यात येत असलेल्या पंतप्रधान किसान ऊर्जा सुरक्षा उपक्रमाला (पीएम-कुसुम) राज्यात गती देण्याचा निर्णय महाराष्ट्र सरकारने घेतला आहे. या अंतर्गत दरवर्षी एक लाख नग याप्रमाणे पुढील पाच वर्षांमध्ये पाच लाख सौर कृषिपंप प्रस्थापित करण्याचे उद्दिष्ट निश्चित केले. या योजनेअंतर्गत खुल्या प्रवर्गातील शेतकऱ्यांना ९० टक्के व अनुसूचित जाती व अनुसूचित जमाती प्रवर्गातील शेतकऱ्यांना ९५ टक्के अनुदानावर सौर कृषिपंप उपलब्ध आहे. या योजनेसाठी ऑनलाईन अर्ज करण्यासाठी महाऊर्जेच्या www.mahaurja.com या संकेतस्थळावर उपलब्ध आहे, असे सांगण्यात आले आहे.