खारघर, ता. ३१ (बातमीदार) : ओवेपेठ गावाकडून शीघ्र कृती दलाकडे जाणाऱ्या रस्त्याच्या उजव्या बाजूला मोकळ्या जागेवर फेरीवाल्यांनी कब्जा केला आहे. याठिकाणी गॅरेज, सर्व्हिस सेंटर, तसेच भंगार माफियांनी बेकायदा दुकाने थाटली असून पालिका कर्मचारी दुर्लक्ष करत आहेत.
खारघर सेक्टर तीस ते चाळीस परिसरात वाहनांच्या संख्येत वाढ होत आहे. तळोजा, ओवेपेठ, वास्तुविहार आणि खारघर टोल नाका, सेक्टर दहामार्गे कोस्टलवरवरून नवी मुंबई, मुंबई परिसरात जाता यावे, या उद्देशाने सिडकोने येथे चौपदरी रस्ता बांधला आहे. गेल्या काही वर्षांत सेक्टर ३४ पासून ४० पर्यंत खासगी, तसेच सिडकोच्या गृहनिर्माण प्रकल्पांमुळे मोठ्या प्रमाणात नागरीकरण झाले आहे. असे असताना पालिका अधिकाऱ्यांचे दुर्लक्ष होत असल्याने बेकायदा सर्व्हिस सेंटर, भंगार व्यवसाय, भाजी विक्री केली जात आहे. त्यामुळे मुख्य रस्त्यावरील या बेकायदा व्यवसायांकडे सिडको, तसेच महापालिकेच्या अधिकाऱ्यांकडून दुर्लक्ष होत असल्यामुळे आश्चर्य व्यक्त केले जात आहे.
----------------------------------
ओवेपेठ गावाकडून शीघ्र कृती दलाकडे जाणाऱ्या रस्त्याच्या बेकायदा व्यवसाय करणाऱ्यांची माहिती प्राप्त झाली आहे. लवकरच त्यांच्यावर कारवाई केली जाईल.
- जितेंद्र मढवी, प्रभाग अधिकारी, खारघर