अंबरनाथ, ता. १ (बातमीदार) : रोटरी क्लब ऑफ अंबरनाथ पूर्व चॅरिटेबल ट्रस्टच्या वतीने आनंदनगर औद्यागिक वसाहतीतील विजय मल्टी स्पेशालिटी रुग्णालयात डायलेसिसची सुविधा उपलब्ध करून देण्यात येणार आहे. त्यात अल्प उत्पन्न गटातील रुग्णांची विनामूल्य सोय केली जाणार आहे.
विजय मल्टी स्पेशालिटी रुग्णालयात शनिवारी (ता. ३) सकाळी ११ वाजता डायलेसिस सुविधेचे लोकार्पण केले जाणार आहे. सध्या अंबरनाथ आणि बदलापूर शहरात डायलेसिस सुविधा नसल्यामुळे येथील रुग्णांना अन्य शहरांत जावे लागत होते. रोटरीच्या वतीने विजय रुग्णालयात २० लाख रुपयांची तीन डायलेसिस यंत्रे बसवण्यात आली आहेत. दिवसभरात नऊ रुग्ण या सेवेचा लाभ घेऊ शकतील. अल्प उत्पन्न गटातील रुग्णांना ही सेवा विनामूल्य दिली जाणार असून, सर्वसाधारण गटातील रुग्णांकडून माफक शुल्क घेतले जाईल. रोटरी क्लबचे ज्येष्ठ सदस्य उद्योजक सुरेश गुप्ता यांनी त्यांच्या दिवंगत पत्नीच्या स्मरणार्थ कंपनीचा सीएसआर निधी या प्रकल्पासाठी दिला. उर्वरित रक्कम रोटरीच्या जिल्हा निधीतून मिळाली. विजय रुग्णालयात यापूर्वीच चार डायलेसिस यंत्रे आहेत. त्यात रोटरीची तीन यंत्रे दाखल होतील. भविष्यात रुग्णालयात आणखी तीन यंत्रे उपलब्ध करून देणार असल्याची माहिती रोटरीचे देवराम गागरे यांनी दिली.